ШОКОЛАДНЫЕ ШАРИКИ 😋🍫

Ингредиенэ:
• үрүҥ глазурь - 100 г;
• үрүҥ сакалаат - 100 г.
Атын-атын тэриэлкэлэргэ глазурь уонна сакалаат тэҥ гына кутабыт. Билигин бииргэ булкуйбаппыт, тоҕо диэтэр ууллар температуралара араас-араас. Микроволновкаҕа уочаратынан уулларабыт. Сакалааты импульсунан уулларабыт, ол аата 15 сөкүүндэ микроволновкаҕа, онтон хостуубут, булкуйабыт, төттөрү угабыт. Маннык ууллуор диэри төттөрү-таары хатылыыбыт.
Онтон иккиэннэрин холбуубут, булкуйабыт. Булкааһык бэлэм буолла.
Шар оҥорор формаларбытын морозилкаҕа тоҥорон ылыахтаахпыт. Оннук гыннахпытына сакалаат формаҕа түргэнник оннун булар.
Сакалаат бастакы дьапталҕатын сотобут. Сфераны сакалаатынан биир да хайаҕас хаалбат гына сыбыыбын. 5 мүнүүтэҕэ морозильникка угабын.
Бастакы дьапталҕа сойдоҕуна, иккиһи оҥоробут. Кичэллээхтик туттабыт- хаптабыт, кытыытыгар сакалаат хаалларыа суохтаахпыт. Арай биһиллэн хааллаҕына кыһыаҕынан (скребогунан) эбэтэр сыппах быһаҕынан ыраастыыбыт. Холодильникка угабыт. Бу сырыыга 30-ча мүнүүтэ туруоран сойутабыт.
Аны билигин сыһыартыыбыт. Миискэ ылабыт уонна начаас кыратык бэйэтинэн оһоххо сылытан ылабыт. Ол кэннэ тиэрэ быраҕабыт, сылыйбыт миискэ түгэҕэр ууллараммыт сакалааттарбытын сыһыарыахпыт.
Билигин үлэлиирбитигэр бэрчээккэнэн туттар ордук. Илиибит сылааһыттан сакалааппыт ууллан иһиэҕэ. Икки илиибитигэр сфера аҥарын ылабыт уонна кытыытын итии миискэҕэ кып-кыратык сыһыаран ылабыт. Хамсатыахха сөп. Онтон сфераларбытын холбуу сыһыаран кэбиһэбит.
Бу сырыыга кыһыл көмүс гына кырааскалаан көрдөрүөм. Кандурин диэн ас кырааскатынан. Улахан киистэ ыламмыт шарбытын сотобут.
Минньигэс сакалааттаах шар бэлэм буолла. Бэлэм тортка араастаан ууруохха сөп.