ШОКОЛАДНО-МЕДОВЫЙ ТОРТ 🍯🍫

Бу торт биллэр классика буолбут медовикпытын санатар, ол эрэн сиэбитиҥ кэннэ сакалаат амтанын хаалларар. Олоччу сакалаат тортар элбэхтэр, оттон бу торт сүрүнэ - манна торт амтанын сакалаат бүтүннүү баһыйбат, мүөтү кытта бэккэ дьүөрэлэһэр. Буоларын курдук, киһи хантан баҕарар булан-талан ылар бородуукталарыттан оҥоһуллар. Оҥоһуута судургу буолбатах эрээри, бүппүтүн кэннэ кэмсиниэххит суоҕа. Бу рецебинэн 2 киилэлээх торт тахсар.
Коржка:
• саахар - 200 г;
• сымыыт - 2 уст.;
• мүөт - 50 г;
• ынах арыыта - 100 г; • сода - 1 ч.нь.;
• какао - 50 г;
• бурдук - 500 г.
Пропиткаҕа:
• 33-35%-наах холбуйуу сүөгэй - 200 мл;
• творожнай сыыр - 200 г;
• саахар - 100 г.
Бүрүйүүгэ сакалааттан крем:
• хараҥа сакалаат - 200 г;
• 33-35%-наах холбуйуу сүөгэй - 200 мл;
• киэргэлгэ сакалааттар.
Миискэҕэ саахар, сымыыт, ынах арыытын уонна мүөт кутабыт. Уу бааннатыгар туруорабыт. Миискэбит анна ууну таарыйыа суохтаах. Саахар ууллуор диэри ититэбит, булкуйабыт. Соданы эбэбит, үчүгэйдик булкуйабыт. Маассабыт элбээн иһиэҕэ. Уоттан уһулабыт.
Какаону анал кондитерскай маҕаһыынтан ылар ордук. Оннук быдан хойуу, өҥө да хараҥа соҕус буолар. Какаону бурдугу кытта кутан булкуйабыт уонна сымыыт булкааһыгар кутабыт. 300 г бурдук эбэбит, ордугун кыра-кыралаан эбэбит. Бастаан тиэстэ убаҕас курдук буолуоҕа, инньэ диэн бурдугу эбии кутумаарыҥ. Тиэстэ холодильникка сынньанан таҕыстаҕына кытаатыаҕа. Тиэстэбитин оҥордубут, салапааҥҥа уган баран, холодильникка 30 мүнүүтэ туруорабыт. Отут мүнүүтэ ааста, тиэстэбититтэн улахана суох шарик быһан ылабыт уонна скалканан тэнитэбит.
Скалкаҕа тиэстэ сыстаҥнаабатын гына бурдугунан сотон биэрэбит. Тиэстэни эргитэ сылдьан тэнитэбин, остуолга сыстыбатын курдук. Ол аайы бурдугу таммалатабын.
Тиэстэбитин тэнитэн бэлэмнээтибит. Үрдүгэр сөптөөх диэбит диаметрдаах бүлүүһэни уурабыт, быһаҕынан кэмнээн ылабыт. Бүлүүһэ оннугар сытыы кырыылаах хаппаҕы туттуоххутун сөп. Тиэстэбитин пергаменнаах духуопка лииһигэр көһөрөбүт. Биилкэнэн анньыталаан биэрэбит. Оччоҕо корж көнө соҕус буолар. 180 кыраадыска 4 мүнүүтэ буһара уурабыт. Тиэстэ сакалааттаах буолан буспутун билэргэ уустук. Ол иһин чопчу кыраадыһын уонна мүнүүтэтин суруйдум.
Тиэстэ тобоҕун хомуйан улахан тиэстэҕэ холбоон салгыы оҥорон иһэбит.
Коржтар сойор кэмнэригэр крем, о.э. сакалааттан ганаш оҥоробут. Бу тортпутун тас өттүн ганаһынан сотуохпут. Хараҥа сакалааты кытта сүөгэйи ылабыт. Сотейникка сүөгэй кутабыт, уокка туруорабыт. Оргуйдаҕына билиитэттэн ылабыт. Онно сакалаат кутабыт. Биир маасса буолуор диэри булкуйабыт. Пленканан бүрүйэбит уонна холодильникка угабыт. Сойорун саҕана хойдуоҕа.
Пропиткабытын оҥоробут. Сыырдаах- арыылаах крем тортка барытыгар барсар. Мүөттээххэ ордук барсар диэтэхпинэ сыыспатым буолуо. Тымныы 33-35%-наах холбуйуу сүөгэйи, творожнай сыыры уонна саахары холбоон бииргэ ытыйабыт. Маасса салгыннаах буолуохтаах. Хас биирдии коржу креминэн сыбыыбыт, ойоҕосторо тэҥ буоларын кэтиибит. Торду 2-3 чаас холодильникка туруорабыт. Ити кэмҥэ бүрүйүүгэ туттар сакалааттан ганашпыт толору сойон бэлэм буолар.
Эргийэр столик уонна икки көрүҥ шпатель наада буолуоҕа. Кинилэр көмөлөрүнэн тортпутун бүрүйэбит уонна сакалааттарынан киэргэтэбит. Маннык декор оҕолорго олус табыгастаах. Хайдах бүрүйэри киһи биир-икки тылынан быһаарбат. Маны илэ көрөн тэҥҥэ оҥорустаххытына сатыаххыт. Онон, барыгытын ютуб каналбар ыҥырабын. Кинигэ бүтэһик сирэйигэр баар ссылканан киирэн көрүөххүтүн сөп. Онно сиһилии көрдөрө-көрдөрө кэпсиибин.
Ханнык баҕарар бырааһынньыктааҕы сандалыны киэргэтэр торт бэлэм буолла. Ыалдьыттаргыт киэҥ биһирэбиллэрин ылыаҕа.

[@user-hx4xn5bi1j]

❤❤😊

[@user-je6zk9rk7v]

Очень приятный голос 🤩

[@user-kk8hr6uz2b]

Уаай спасибочки отой от души баи эбит Ди учугэй багайы канал буллум бытта😍🎉

[@user-kq8br5ge9w]

наьаа учугэй канал❤

[@popovtar]

Как приятно😍 махтааал!

[@user-zr7dn3lb4i]

🎉🎉🎉👏👏👏

[@user-ez7ig4jt4e]

❤