РУЛЕТ «СНИКЕРС» 😍

Ингредиенэ, бисквиккэ:
• сымыыт - 4 уст.;
• саахар - 100 г;
• мас арыыта - 30 мл;
• бурдук-80г;
• какао-20г;
• үүт-100мл.
Кремҥэ наада:
• 33%-наах холбуйуу сүөгэй - 100 мл;
• сливочнай сыыр - 100 г;
• буспут сгущенка - 1 ост.нь.;
• саахар-50г.
Начыыҥкаҕа:
• бэйэ оҥоһуута карамель - 300 г;
• ыһаарыллыбыт арахис - 100 г.
Глазурьга:
• сакалаат - 100 г;
• мас арыыта - 40 мл;
• бытархай ыһаарыллыбыт арахис -50г.
Бастаан корж оҥоробут: дириҥ миискэҕэ сымыыты булкуйабыт, саахар эбэбит. Миксеринэн күүгэннэниэр диэри ытыйабыт. Саахардаах сымыыт сырдыахтаах уонна эбиллэн иһиэхтээх. Онтон аргыый аҕай мас арыытын кутабыт уонна 20-чэ сөкүүндэ миксеринэн эрийтэрэбит. Салгыы бурдугу уонна какао сиидэлиибит, иккитэ төхтүрүйэн кутабыт. Бастакы түһүмэх кэнниттэн биир маасса буолуор диэри хайаан даҕаны булкуйабыт, ол кэнниттэн хаалбыт бурдуктаах какаобутун кутан эмиэ биир маасса оҥоробут. Тиэстэ биир да хомуога суох, венчиктэн лиэнтэ курдук сүүрдүллэн түһэр буолуохтаах.
Духуопка лииһигэр пергамент тэлгиибит уонна онно тиэстэбитин кутан тэҥниибит. 180 кыраадыска 15 мүнүүтэ буһара уурабыт.
Коржпутун духуопкаттан хостуубут, ыраас лиискэ эргитэн уурабыт. Буспут лииһин ылан кэбиһэбит. Корж итии эрдэҕинэ рулет гына эргитэбит. Итиитигэр оҥорор ордук, хайдыа суоҕа. Туспа сойута уурабыт.
Креммитин бэлэмниибит. Миискэҕэ тымныы сүөгэйи, сливочнай сыыры уонна 60 г саахары кутабыт. Барытын миксеринэн хойдуор диэри 2-3 мүнүүтэ эрийтэрэбит. Онтон буспут сгущенканы кутан эмиэ миксердиибит.
Сойбут коржпутун ылан төттөрү көннөрөбүт, креминэн дэлэйдик барытын биһэбит. Салгыы бэйэбит оҥорбут карамельбытын ылан, кондитерскай мөһөөччүккэ кутабыт уонна кыратык хайаҕастыыбыт. Бэйэ оҥоһуута карамель рецебин «Начыыҥка» диэн баска булуоххут. Карамельбытын корж үрдүгэр «змейкалыы» кутабыт сыбаабаппыт, хайдах кутабыт да оннук хаалларабыт. 100 г ыһаарыламмыт арахиһы таммалатабыт. Рулеппытын эргитэбит, бүлүүһэҕэ уурабыт.
Глазурьбутун бэлэмниибит. Сакалааппытыгар мас арыытын кутан баран, микроволновкаҕа ууллара угабыт. Үчүгэйдик кичэйэн булкуйабыт. Бу сырыыга арахиспыт үлтүрүтүллүбүт буолар. Бэлэми кондитерскай маҕаһыынтан атыылаһыахха сөп, эбэтэр блендергэ начаас кыратык эрийтэрэн ылыахха сөп. Үлтүрүтүллүбүт арахиһы сакалааттаах глазурьга эбэбит уонна барытын
булкуйабыт.
Рулеты глазурунан бүрүйэбит уонна икки чааска холодильникка угабыт.
Минньигэс начыыҥкалаах «Сникерс» рулеппытын сандалыга ууран дьиэлээхтэрбитин аһатабыт. Минньигэс аһылыгы!

[@inna_t]

маны как торт онороха сеп до ?