ПОНЧИКИ 🍩

Биһиэхэ наада:
• сылаас уу - 250 мл;
• сылаас үүт - 250 мл;
• сымыыт - 1 уст.;
• саахар - 2 ост.нь.;
• ванильнай саахар - 10 г; • туус - 1 ч.нь.;
• мас арыыта - 3 ост.нь.;
• доруоһа - 1 ост.нь.;
• бурдук - 800-900 г.
Киэргэтиигэ:
• үүттээх сакалаат - 150 г; • үрүҥ сакалаат - 150 г;
• мас арыыта - 50 мл;
• киэргэтиигэ посыпка.
Доруоһалаах тиэстэм рецебэ миэнэ универсальнай. Ушки буоллун, бэрэски буоллун, буулка буоллун, барытыгар бу рецебинэн оҥоробун. Бу сырыыга саахарын элбэтэбин, ванильнай саахар эрэ эбэбин.
Ингредиеннэри барытын тэҥҥэ кутаммыт булкуйабыт. Ол аата сылаас уу, сылаас үүт, саахар, ванильнай саахар, сымыыт, туус, доруоһа, мас арыыта. Олох үчүгэйдик ытыйабыт. Сылаас эрэ үүккэ, ууга доруоһа тахсарын өйдөөҥ. Ол кэннэ кыра-кыралаан бурдук кутуллар, сырыы аайы булкуйан иһэбит. Син хойдубутун кэннэ тиэстэбитин остуолга көһөрөн мэһийэн биэрэбит уонна 1 чаас устата сылаас сиргэ таһаара уурабыт.
Тиэстэ бастакы тахсыытын кытта остуолга көһөрөн икки гына аҥардааммыт, бастакы тиэстэни скалканан тэнитэбит. Тиэстэни наһаа чараас оҥорумаарыҥ, син эттээх соҕус буолар. Пончик быһыытын оҥорорго чааскынан быһан баран, ортотун помада хаппаҕынан быһыахха сөп. Эбэтэр мин «Уютно» маҕаһыыммар пончик формата атыыга баар, онон туһаныаххытын сөп. Ити курдук, тиэстэбитин барытын пончиктыыбыт.
Хобордооххо мас арыытын сылытабыт, бэрэскигэ курдук элбэх буолуохтаах. Дьэ, уонна пончиктарбытын икки өттүттэн саһарчы ыһаарылыыбыт. Тиэстэни бастаан арыыга уган баран тутатына эргитиэххэ наада. Эргиппэтэххэ хайдан хаалар. Пончикпытын барытын буһаран баран, аны сакалааппытын бэлэмниибит.
Мин киэргэтиигэ үүттээх уонна үрүҥ сакалааты туһанным. Сакалааттарбытыгар кыратык мас арыыта кутабыт уонна микроволновкаҕа 15 сөкүүндэ уга угабыт хостооммут булкуйабыт. Тоҕо итиччэ кылгастык угабыт диэтэххэ, тутатына 30 сөкүүндэ уктаххытына сакалаат буһан, хоруоран хаалар. Ол иһин убаҕас сакалаат оҥорон таһаарабыт.
Сойбут почниктарбытын сакалаакка уган ылабыт уонна араас посыпкаларынан киэргэтэбит.
Пончиктар бэлэм буоллулар. Өрөбүллэргэ итии чэйи кытта сииргэ олус бэртээхэй буолар. Минньигэстик аһааҥ!

[@user-by3my1xn8m]

Бугун онордум!оьубай буолла❤баьыыба

[@user-kc7xw6ew9o]

Мип -- минньигэс махтал❤

[@user-pi3qc9sz9u]

Кенннеру плитка шоколады уулларыаха сеп да?