Крокенбуш торт 🎂 бу заварной тиэстэ олус бэккэ табыллар🤩

25-30 устуука буһарыылаах (заварной) пирожнайга:
• үүт - 125 гр;
• уу - 125 мл;
• ынах арыыта - 100 гр;
• сымыыт - 5 уст.;
• бурдук - 150 гр;
• саахар - 1 ост.нь.;
• туус.
Начыыҥкаҕа:
• 33-35%-наах холбуйуу сүөгэй - 200 гр;
• творожнай сыыр - 200 гр;
• саахар - 100 гр.
Ганашка:
• хара сакалаат - 50 гр;
• үүт - 40 гр.
Киэргэлгэ:
• клубника;
• сугун.
Ынах арыытын орто кубик гына быһабыт уонна 1,5-2 л сотейникка кутабыт. Үүтү, ууну уонна тууһу эбэбит. Сотейнигы уокка оргуйуор диэри туруорабыт. Арыы олоччу ууллуохтаах.
Бурдугу хайаан да сиидэлээриҥ, хомуок баар буоллаҕына оргутуу кэмигэр ону суох гынар олус уустук буолуоҕа.
Сотейник уокка турар кэмигэр бурдугу барытын кутабыт.
Мас ньуосканан эбэтэр лопатканан сэниэлээхтик булкуйа-булкуйа 1-2 мүнүүтэ орто уокка оргутабыт. Бу кэмҥэ тиэстэ биир маасса буолан, ньылаархай хомуокка кубулуйуохтаах. Оттон сотейник түгэҕэр чараас бурдук бүрүөһүнэ үөскүөхтээх.
Оргуйбут тиэстэ сороҕун миискэҕэ кутан сойутабыт. Түргэнник сойорун гына 4-5 мүнүүтэ устата ньуосканан булкуйааччыбын.
Тиэстэ сойон эрдэҕинэ булкуйа-булкуйа биирдии-биирдии сымыыт эбэбит. Сымыыт барыта булкуллубутун кэннэ, тиэстэбит аҥарын эбэбит. Олус сымнаҕас, кылабачыгас тиэстэ буолан тахсыахтаах.
Бэлэм тиэстэни төгүрүк насадкалаах кондитерскай мөһөөччүккэ кутабыт. Оннук суох буоллаҕына, халыҥ салапааҥҥа кутаарыҥ уонна биир муннугун кырыйаарыҥ, эбэтэр 2 чайнай ньуоска көмөтүнэн тиэстэҕитин кутуоххутун сөп. Духуопка лииһигэр анал ас кумааҕытын тэлгиибит уонна дьэ бэйэ-бэйэлэриттэн 3-4 см арыттаах тиэстэбитин орто сыыр курдук форма буоларын курдук ыгабыт.
Тиэстэ кутурук курдук түмүгүн тарбаххытын ууга илитэн баран кыратык лэппэтэн биэрээриҥ.
Эрдэттэн 180 кыраадыска диэри сылытыллыбыт духуопкаҕа 30 мүнүүтэҕэ профитролиларбытын буһара уурабыт. Манна саамай сүрүнэ: бастакы 20 мүнүүтэ буһар кэмигэр духуопка аанын олох арыйымаарыҥ, арыйдаххытына түһэн хаалыахтара. Бэлэм профитролилары духуопкаттан хостоон сойута уурабыт.
Киэргэлгэ анаан креммитин оҥоробут. Маныаха заварной крем оҥоруохха сөп, ол эрэн мин бу креми ордоробун. Бу сыырдаах-арыылаах (сырно-сливочный) крем оҥоһуута барыта биир буолар. Кини элбэх сэмсэ аска барсар. Сүөгэйи, сыыры, саахары холбоон биир маасса буолуор диэри миксеринэн эриттэрэбит. Хомуога суох буолуохтаах. Ол кэннэ крем мөһөөччүгэр кутабыт уонна заварной пирожнайдарбыт иһигэр кутабыт.
Киэргэтиигэ анаан сакалааттан ганаш оҥоробут. Хараҥа сакалааты үүтү кытта микроволновкаҕа импульсунан 10 сөкүүндэ уулларабыт. Булкуйабыт. Сойутан баран, кондитерскай мөһөөччүккэ кутабыт.
Кремнээх шариктары конус быһыылаах гына этээстии уурабыт, кремнээх мөһөөччүгүнэн кыратык сыбыы-сыбыы. Бэлэм харыйабытын сакалааттан оҥоһуллубут ганаһынан уонна сибиэһэй отоннорунан киэргэтэн биэрэбит.

[@user-hf9qm7tt2x]

Көрө, көрө киһи астаан киирэн барыах курдук наһаа астыктык кэпсиигин❤

[@user-bu4ld2go4b]

Дуняша дьэ асчыт кыыскын!🎉👏👍

[@user-vx9nu8gz1w]

Учугэй баайы буолбута, онорон корбутум👍🏼 спасибо 🤗

[@irinastruchkova6718]

❤