IMBESTIGASYON SA NAMATAY NA KALABAW;OPERASYON NG ECIJA POLICE SAN ANTONIO;TATLONG LALAKI NAARESTO

IMBESTIGASYON SA NAMATAY NA KALABAW ISINAGAWA NG CITY VET
NAGSAGAWA kamakailan ng isang imbestigasyon ang tanggapan ng Cabanatuan City Veterinary Office sa naging sanhi ng kamatayan ng isang kalabaw sa siyudad.
Ang mga ganitong pagsusuri ay kailangan para matukoy ang sanhi ng kamatayan, partikular na upang maalis ang mga nakakahawang sakit na maaaring magdulot ng panganib sa ibang mga hayop o maging sa mga tao.
Ang pangkat ng beterinaryo ay nangolekta ng mga sample para sa pagsusuri sa laboratoryo upang malaman kung ang kalabaw ay namatay sa isang karaniwang sakit sa hayop, tulad ng foot and mouth disease, anthrax, o iba pang impeksyon dulot ng viral o bacterial.
Nakatutulong ang mga pagsisikap na ito sa pamamahala sa kalusugan ng hayop, pagpigil sa paglaganap ng sakit, at pagtiyak ng kaligtasan ng publiko.
Kung kayat nagsusumikap ang tangapan ng City Vet na mapanatiling disease free ang mga alagang hayop sa siyudad ng Cabanatuan sa direktiba narin ni Mayor Myca Elizabeth R Vergara kay Dr Lorna Fajardo ang department head ng opisina.
______________________
OPERASYON NG ECIJA POLICE SA SAN ANTONIO, MATAGUMPAY
NAKAKUMPISKA ang kapulisan sa Nueva Ecija ng isang Cal .45 na baril at Php 34,000 halaga ng iligal na droga sa isinagawang operasyon, nitong October 8, 2024.
Bandang alas 10:15 ng umaga, nagsagawa ng search warrant ang mga tauhan ng San Antonio Municipal Police Station, sa Purok 6, Barangay Tikiw, San Antonio Town, dahil sa paglabag sa R.A. 10591 laban sa isang 44-anyos na lalaking suspek.
Bagama't nakaiwas ang suspek sa pag-aresto, nasamsam ng mga awtoridad ang isang Cal .45 na baril, pitong (7) bala, drug paraphernalia, 5 gramo ng iligal na droga na nagkakahalaga ng Php 34,000, isang digital weighing scale, isang ice pick, at isang kutsilyo.
Dahil naman dito, pinuri ni PCOL Ferdinand Germino, Provincial Director ang matagumpay na lakad ng tropa laban sa loose firearms. Hinihimok niya ang lahat ng may hawak ng baril na kumilos nang responsable at lumahok sa mga hakbangin tulad ng Balik Baril Program, upang matiyak ang kaligtasan ng komunidad.
___________________________________
TATLONG LALAKI NAARESTO SA SEMENTERYO NG LAUR
TATLO (3) katao ang inaresto dahil sa paggamit ng ilegal na droga sa loob ng isang sementeryo sa Barangay Sagana, Laur, Nueva Ecija.
Sinabi ni PMAJ Joseph Morden, kinilala ang mga suspek na isang 40-anyos, isang 39-anyos, at isang 24-anyos, ang mga ito ay pawang lalaki at kapwa residente ng barangay Sagana, Laur.
Binanggit na isang concerned citizen ang nakakita umano sa 3 lalaki na gumagamit ng iligal na droga sa loob ng sementeryo kaya agad itong ipinagbigay alam sa mga awtoridad, na nagsagawa naman agad ng pagresponde kaya naaresto ang mga suspek.
Nakuha sa 3 ang iligal na droga (hinihinalang shabu) at mga drug paraphernalia, kabilang ang anim na ginamit na aluminum foil, apat na lighter, at isang pakete ng sigarilyo.
Dinala ang mga suspek, kasama ang mga nakumpiskang ebidensya, sa Laur Police Station, na mahaharap sa kasong paglabag sa Comprehensive Dangerous Drugs Act of 2002 (RA 9165).
Pahayag naman ni PD PCOL Ferdinand Germino, na bagamat naka pokus sila sa ngayon sa pagbabantay sa COC filing ng mga kakandidato sa 2025 elections ay hindi pa rin sila humihinto sa pagsugpo sa pagkalat ng ilegal na droga sa komunidad.
_______________________