ТОРТ «КРАСНЫЙ БАРХАТ» 🎂

Икки этээстээх торду хайдах оҥорору эһиэхэ уруккуттан көрдөрүөхпүн, кэпсиэхпин баҕарабын. Элбэх араҥалаах торду хомуйуу бэйэтэ элбэх ымпыктан-чымпыктан турар. Маны сатаатаххытына улахан тортары ааһан иһэн оҥорор буолуоххут. Технология төрүтэ биир буоллаҕа.
«Кыһыл бархат» торт рецебин туһанным. Эһиги начыыҥкатын, бисквитин хайдах сөбүлүүргүтүнэн оҥоруоххутун сөп.
Ингредиенэ (4 киилэлээх бисквиккэ):
• бурдук - 440 г;
• саахар - 400 г;
• какао - 2 ост.нь;
• сода-2ч.нь.;
• 3,2%-наах кефир - 380 мл;
• сымыыт - 4 уст.;
• мас арыыта - 100 мл;
• кыһыл краситель - 2 ост.нь.
Иҥэринэригэр кремҥэ ингредиенэ:
• 25-33%-наах холбуйуу сүөгэй - 600 мл;
• творожнай сыыр - 600 г;
•саахар-200г;
• клубникаттан конфитюр.
Бүрүйэргэ кремҥэ ингредиенэ:
• ынах арыыта - 300 г;
• творожнай сыыр - 600 г;
• сахарнай пудра - 200 г.
Бу рецепт 4 киилэлээх тортка анаммытын умнумаарыҥ. Икки киилэлээх торт оҥороору гыннаххытына ингредиент аҥардарын туттаҕыт. Бу рецебинэн оҥоһуллубут торт олус кэрэ көстүүлээх уонна минньигэс бөҕө буолар. Бисквит сүмэлээх, сыттаах-сымардаах, оттон торт быһылыннаҕына ураты кэрэ көстүүлэнэр.
Бисквиппитин астыыбыт. Оҥоһуллара судургу. Улахан кураанах ингредиеннэри - саахар, бурдук, какао, сода кутабыт, булкуйабыт. Манна сымыыт, кефир, мас арыыта уонна краситель кутабыт. Тиэстэбитин орто түргэҥҥэ биир маасса буолуор диэри 4-5 мүнүүтэ эрийтэрэбит. Тиэстэни 5 мүнүүтэ туруора түһэбит.
4 киилэлээх икки этээстээх торт оҥорорбутугар 14 см уонна 18 см диаметрдаах форма наада буолар. Формабыт аллара өттүгэр пергамент тэлгиибит. 4 бисквит буһарабыт, онон тиэстэбитин 4 аҥы тэҥнии үллэрэбит.
150 кыраадыска диэри эрдэ сылытыллыбыт духуопкаҕа коржтары биирдии чаас буһара уурабыт. Коржтар буспуттарын суоҕун зубочистканан бэрэбиэркэлиибит, кураанах буолуохтаах. Бэлэм бисквиттэри толору сойутабыт. Бисквит буһарын саҕана үрдэ үллээччи, биһиэхэ биир тэҥ коржтар наадалар, онон үллүбүтүн быһан ылабыт.
Креммитин оҥоробут. Тымнытыллыбыт сүөгэйи, сыыры уонна саахары холбоон көбдөркөй буолуор диэри эрийтэрэбит. Крем хомуога суох уонна бөҕө буолуохтаах. Тортпутун хомуйан саҕалыыбыт. Аллараа араҥа остуолга ууруллардыы хомуллуохтаах. Анал подложка туттуохпут. Икки араҥа тус- туспа хомуллаллар. Аллараа араҥаны кремниибит, клубникаттан конфитюрбутун соторбутун умнубаппыт.
Иккис этээһин хомуйан оҥоробут. Корж курдук диаметрдаах (0,5 см кыратык улахан) подложканы туттуҥ. Ортотунан кыра хайаҕас оҥоробут. Кииҥҥэ наада буолуо, киин (ось) туһунан онтон кэпсиэм. Подложка уонна корж икки ардыгар крем эбэбит, үчүгэйдик иһит ылабыт, тутуһарын гына. Бисквит араҥаларын кремниибит, клубникалаах конфитюрбутун эмиэ умнубаппыт.
Икки хомуллубут торпутун холодильникка хас да чааска угабыт. Түүн хоно хааллаҕына өссө бэрт. Оннукка бэйэ-бэйэлэригэр үчүгэйдик иҥэрсэллэр. Уонна улахан торт өр тура түһэрэ олус наадалаах, оннун булар.
Тас өттүлэрин кремниирбитигэр арыылаах крем-чиз оҥоруохпут. Онуоха онно туһаныллар ингредиеннэр бары дьиэ иһинээҕи температуралаах буолуохтаахтар. Сымнатыллыбыт ынах арыытын сахарнай пудраны кытта эрийтэрэбит. Бу крем-чиз рецепкэ хайаан да пудра буолара наада. Саахар тутуннаххытына ууллуо суоҕа. Чэ, ол курдук миксеринэн эрийтэрдэххитинэ арыылаах маасса сырдаан иһиэҕэ. Онтон творожнай сыыр кутабыт. Наһаа өр эрийтэрбэппит, арахсыталаан хаалыаҕа. Биир маасса буолуор диэри эрийтэрэн баран тохтуубут.
Дьэ, билигин торт хомуйуутугар киирэбит. Кондитерскай шпатель көмөтүнэн тортар ойоҕосторун, үрдүлэрин тэҥ гына сыбыыбыт. Алларааҥы араҥа бөҕө буоларыгар пластиковай турбочкалары эбэтэр мас палочкалары туттабыт. Мин биир үксүн суши палочкаларын туттабын. Тэҥ кээмэйдээх буолуохтаахтар. Ити палочкалар аллараа араҥаҕа курдаттыы киирэннэр, үөһээ этээс ыйааһына алларааҥыны баттаабатыгар эппиэттииллэр. Ол кэннэ кииммитин бэлэмниибит. Ити киин икки этээһи холбуур оруоллаах. Кини баар буолан ити хас да этээстээх тортар сатаан тиэллэллэр.
Бэлэм икки тортпутун 1 чаас устата морозилкаҕа тоҥорон ылабыт. Ол кэннэ кииммитин аллараа араҥаҕа түгэҕэр диэри анньабыт уонна кыра торду сэрэнэн үөһэ уурабыт. Ойоҕосторун, тортар силбэһэр сирдэрин креминэн сотон биэриҥ.
Бу этээстээх торду хомуйууну суругунан быһаарар уустук дии саныыбын. Ол иһин мин ютуб каналбар видео рецепт уһулан укпутум. Ону киирэн көрөөрүҥ диэн сүбэлиибин. Ютуб каналым ссылката кинигэ кэннигэр баар.
Икки араҥалаах торт бэлэм буолла. Хайдах сөбүлүүргүтүнэн кремтэн оҥоһуллубут сибэккилэри, фрукталары, отоннору, араас атын минньигэстэри ууран киэргэтиэххитин сөп.
Минньигэстик аһааҥ!

[@АлександраПетрова-о1щ]

Наьаа астыык, махаал. Онорон керуем❤

[@МарияБогимова]

❤Махтаал

[@ttumzzesss]

анардас сливки 33% эрэ барсыа ду с сахаром кремна?😅