ЧИХРИЙН ШИЖИН ХЭВШИНЖ 2 БА ТҮҮНИЙ ХҮНДРЭЛҮҮД

Чихрийн шижин нь цогц, нийлмэл, олон хүчин зүйлийн хамааралт өвчин болохыг ойлгоход бидэнд 200 жил шаардагдсан ажээ.
Чихрийн шижин хэвшинж 1 нь залуу хүмүүст зонхилон тохиолдох ба нойр булчирхайн бета эс аутоиммуны механизмаар сонгомлоор гэмтэж, инсулины туйлын дутагдалд хүргэдэг эмгэг юм.
Чихрийн шижин хэвшинж 2 нь удамшлын болон амьдралын буруу хэв маягаас шалтгаалан инсулиний шүүрлийн алдагдал болж улмаар инсулиний харьцангуй болон туйлын дутагдалд хүргэдэг эмгэг юм.
Нүүрс-усны агууламж өндөртэй, илчлэг ихтэй хоол хүнсний хэрэглээ нэмэгдэж, суугаа амьдралын хэв маяг давамгайлах болсноор биеийн жин нийт хүн амын дунд нэмэгдэж байгаа нь чихрийн шижин хэвшинж 2-ын тархалт дэлхий даяар сүүлийн хагас зуун жилд хурдацтай нэмэгдэх гол хүчин зүйл болж байна. Судалгаанаас харахад чихрийн шижин хэвшинж 2-той өвчтнүүдийн дийлэнх нь илүүдэл жинтэй байна. Хэдийгээр чихрийн шижин хэвшинж 2 нь ахимаг насанд зонхилон тохиолдох боловч сүүлийн жилүүдэд уг өвчин залуужиж, өсвөр үе, залуучуудад оношлогдох болсон.
Чихрийн шижингийн хяналт муу, эмчилгээ хангалтгүй байгаа тохиолдолд олон эрхтэн системийн талаас хүндрэл гардаг.
Чихрийн шижингийн нүдний хүндрэл нь сохролд хүргэх аюултай эмгэг бөгөөд эрт оношилж, эмчилсэн тохиолдолд харааг хадгалж үлдэх боломжтой.

[@a.2308]

баярлалаа амжилт😊