O veleiro verde - María Fumaça

Canción incluída no libro-disco "O veleiro verde", de María Fumaça (Editorial Galaxia, colección Sonárbore 2019)
www.editorialgalaxia.gal/produto/o-veleiro-verde
Xa está aquí María Fumaça!!
O veleiro verde non é un disco calquera. É unha explosión de cor, un lóstrego de esperanza, unha greta pola que se coa o optimismo dando chimpos de alegría. A mensaxe é clara: temos azos para afrontar a travesía do futuro. O veleiro verde de María Fumaça é moito máis que un veleiro. É un transformador de enerxía. Proba a subir nel e verás como podes cambiar o mundo, desafiar a lei da gravidade e voar a outros universos, onde poder recomezar e habitar un espazo máis leve, máis lúdico e máis humano.
Soltamos amarras, despregamos velas e iniciamos a travesía máis fascinante polo mar da liberdade co capitán Ruí e a extensa familia María Fumaça. Desta volta botamos leña á caldeira e subimos un chisco os decibelios, con toda a enerxía, con máis flow, ventos, metais, rock rebelde, co noso “ruiguetón”, e funk, sen esquecer o tradicional, marca da casa.
Subide tod@s a bordo!!!
Letra e música: Uxía
Tema dedicado ao Rainwow Warrior e a Greta
Video dirixido por Olih Conde (Oliconh)
Stop Motion por Breogán Sousa e María Selgas Letra:
(Ao Rainbow Warrior de Greenpeace)
A terra treme,
medran os mares,
falan os ventos,
todos son sinais.
A terra seca,
xa o dixo Greta*,
arde o planeta
e haino que salvar.
Mais hai un veleiro verde
co arco da vella a ondear.
Hai un veleiro verde
en marcha polo clima sen parar.
E os paxaros
caen do ceo,
medra o desxeo,
a deforestación.
Peixes, baleas
intoxicadas
de lixo e plástico
que van para o mar.
Mais hai un veleiro verde
que pregoa un novo mencer,
hai un veleiro verde
para mudar o mundo e renacer.
Esta é unha alerta,
unha carta aberta
que nos di
que temos a solución.
Fóra a cobiza da Amazonia,
o fume negro que asfixia o ar.
Mais só temos unha terra
e a esperanza verde a navegar.
Guerreiras do arco da vella,
viremos o rumbo agora xa.
E só temos unha terra
e a esperanza verde a navegar.
Guerreiras do arco da vella,
viremos o rumbo agora xa.
*Greta Thunberg, nena suecacon autismo que se fixo popular por promover folgas escolares en defensa do medio ambiente e que é símbolo do movemento pola xustiza climática.