Сənnət alması.| Əli Əsgər| şeir

#seir #aliasgar #cennetalmasi
Cənnət alması adlı bu şeirimi sizin üçün səsləndirdim. Əgər .şeiri və səsləndirməni bəyənsəniz, "bəyən" düyməsini basın. Kanala abunə olsanız, sevinərəm. :)
Qızılı bir alma oğurlamışam,
Səthi nur çiləyir, gözümə düşür.
Həyatda iblisi fağırlamışam,
Yuxumda mələklər izimə düşür.
Çəpərlər aşıram döngədə, tində.
Hər yeni dalanda qapı açıram.
Nəfəsim kəsilir, qan-tər içində
Qaçıram. Yıxılıb, durub, qaçıram...
Heyrətə salmışam, cənnət izləyir:
Axtarır hər baxış bir ali niyyət.
Tutsalar cəhənnəm, alov gözləyir.
Bir almaya dəyər əzab-əziyyət?
Dünyaya aparan yola çatıram,
Açılır son qapı zülmətə, ey yar!
Yumuram gözümü, addım atıram,
Açıram - on addım məsafəmiz var.
Ardımca uçuşur qanadlı ordu.
Əzrayıl səsləyir: "qaçma, dur" - deyir.
İsrafil surunu qəfil duyurdu.
Səs gəlir səmadan: biri "vur" - deyir.
Belimə saplanır məlaküt oxu,
Çökürəm diz üstə: bağışla bizi...
Xəyalın - həqiqət, həyatım - yuxu,
Qanlı əllərimdə cənnətin izi.
Taptala sevgimi ölənə qədər,
Ruhumu önünə sərmişəm yenə.
Bu şirin günaha ortaq ol, yetər.
Bir cənnət alması dərmişəm sənə...
Əli Əsgər