كريم كراميل بيتي كريمي ووصفة مضمونة بمكونات عادية جدا..

الكريم كراميل البيتي :)
الكريم كراميل من أرقى وألذ الحلويات وهي أصلها وصفة فرنسية..
شوية ملاحظات مهمة:
*لتجنب تكون طبقة قشرية على وش الكريمة اثناء السوا في الفرن لازم نغطي الأطباق بورق فويل (مسموح استخدامه نظرا إنه مش بيلامس سطح الكريمة ولكن الأفضل طبعا نحط الأول ورقة زبدة وبعدين الفويل مع التأكد من قفلها بإحكام وعدم ملامستها للكريمة علشان نضمن سطح مستوي).. كل ده موضح في الفيديو..
*لازم نسوي الكريم كراميل في حمام مائي (وبشكل عام يفضل خبز الحلويات اللي مش بتتكون من دقيق في حمام مائي)..
*لازم نصفي الكريمة (اللي هي اللبن والبيض والسكر) قبل ما نصبها في الأطباق وده لضمان قوام كريمي سلس زي الجاهز..
*الإضافة اللي جربتها وفعلا نجحت هي إني جربت صوص الكراميل اللي بنستعمله توبينج للكيكات والحلويات (وصفته بالتفصيل على الصفحة) وكانت النتيجة واللون هايلين..
*كل لما سبنا الكراميل يهدى قبل ما نصب عليه الكريمة كل ما كان الشكل النهائي أحلى وتكون طبقة الكريمة صافية مفيهاش كراميل.. يعني منستعجلش عليه وهو لسة سخن علشان مايخطلتش بالكريمة واحنا بنصبها..
نبدأ الوصفة:
أولا: الكراميل:
١ كوب سكر للكراميل
١ كوب مية و١/٢ كوب سكر (يدوبوا على النار ويكونوا سخنين)
ثانيا: الكريمة أو الكاسترد أو الفلان..
المقادير:
2 بيضة كاملة
٢ صفار بيض
½ كيلو (500 جرام) لبن
كيس فانيليا نكهة قوية
عصير نص ليمونة (اختياري ولكن اضافته بتدي نكهة حلوة وبتضيع أي ريحة للبيض)
١/٢ كوب سكر (ممكن أكتر أو أقل حسب الرغبة)
طريقة الكريمة:
1. نحط اللبن والكريمة يسخن بس ميغليش..
2. في الوقت ده نجهز خليط البيض والسكر..
3. نضرب الخليط بالمضرب السلك لغاية لما اللون يبقى كريمي خفيف فاتح وبلاش نكتر في الخلط..
4.نشيل أي من الفقاعات اللي بتظهر على وش الخليط
نبدأ نخلط خليط البيض مع اللبن عن طريق وضع كمية بسيطة من خليط اللبن السخن على خليط البيض ويخلط كويس وسريعا (العمليةدي إسمها Tempering وهي تهيئة الخليط السخن لاستقبال الخليط البارد حتى لا يتجمد البيض أو يتحول لبيض أومليت. وبعد كده نضيف خليط اللبن كله على البيض ونقلب سريعا..
5. نصفى الخليط باستخدام مصفاة علشان نتخلص من اي شوائب للبيض..وبرده نشيل أي فقاعات تظهر على الوش (كل ده لضمان خليط كريمي حلو)
6. نصب الكريمة على الكراميل بالراحة ونغطي كل بولة بفويل أو بورق زبدة وفويل
7. نجهز صينية كبيرة ونرص فيها البولات ونملاها مية وندخلها الفرن على نار متوسطة لهادية في الرف اللي في النص.
بنطلع الكريم الكراميل لما نلاقي الكريمة ماسكة بس بتتهز أو بتتحرك خفيف من النص (شبه الجيلي)
نسيب الكريم كراميل يهدى وبعدين نغطية بكلينج فيلم ونسيبه في التلاجة مش أقل من أربع ساعات قبل التقديم..
عند التقديم بنقلبه في طبق التقديم واستمتعوا بأحلى كريم كراميل بيتي :)
وبألف هنا :)