A1 Report - Ndahet nga jeta “Doktor Flori” Përcillet për në banesën e fundit

TIRANE- Këngëtari i mirënjohur shqiptar, Floran Kondi, ose i njohur ndryshe si Doktor Flori, ka humbur jetën mëngjesin e djeshëm. “A1 REPORT” mësoi se këngëtari i njohur i muzikës shqiptare kishte shfaqur shqetësime shëndetësore dhe u dërgua i pajetë në spitalin Universitar “Nënë Tereza” në Tiranë. Paraditen e sotme nga ora 09:00 deri në 11:00 janë zhvilluar homazhet në nderim të këngëtarit në hollin e RTSH-së.
Pas përfundimit të homazheve Doktor Flori është përcjellë për në banesën e fundit te Varrezat e Sharrës.
Doktor Flori ndërroi jetë mëngjesin e djeshëm në një moshë të re dhe la pas dy fëmijë, një vajzë 7 vjeç dhe një djalë të vogël, i cili ka vetëm tre muaj që ka lindur. Urgjenca e QSUT-së konfirmoi se i riu mbërriti pa jetë rreth orës 10:30 minuta në spital. Shkak i vdekjes së këngëtarit dyshohet një takikardi. Referuar të dhënave që vijnë nga Mjekësia Ligjore bëhet me dije se nga ekspertiza praraprake dyshohet se vdekja ka ardhur si shkak i mbingarkesës së trupit me substanca narkotike, gjë që dyshohet se ka stimuluar vdekjen e këngëtarit 35-vjeçar. Ndërkohë, pritet pikërisht rezultati përfundimtar i ekspertëve mjeko-ligjor, për të mësuar edhe shkaqet reale të ndarjes nga jeta të “Dr Florit” paraditen e djeshme.
Prej ditës së djeshme shtëpia e prindërve të Doktor Florit hapi dyert për të pritur ngushëllimet nga miqtë e të afërmit, por edhe nga gjithë ata që e njohën këngëtarin.
Doktor Flori është krijues i grupit muzikor mjaft të njohur dhe të pëlqyer nga të rinjtë “West Side Family”. Ndërsa pas shkëputjes nga miqtë e tij Landi dhe Miri, doktor Flori ka kënduar si solist por nuk kanë munguar edhe duetet, ku më të suksesshmit janë ata me Aurela Gaçen dhe Ermal Mamaqin.