ओवाळू आरती मदन गोपाळा

ओवाळू आरती मदन गोपाळा ।
श्यामसुंदर गळा वैजयंती माळा || धृ ||
चरणकमल ज्याचें अति सुकुमार ।
ध्वजवज्रांकुश ब्रीदाते तोडर । १.
नाभिकमलीं ज्याचें ब्रम्हयाचे स्थान ।
हृदयी पदक शोभें श्रीवत्सलांछन । २.
मुखकमल पाहतां सूर्याच्या कोटीं ।
मोहिले मानस कोंदियली दृष्टीं । ३.
जडितमुगुट ज्याचा दैदीप्यमान |
तेणें तेंजे कोंदले अवघे त्रिभुवन । ४.
एका जनार्दनीं देखियेलें रूप ।
रूप पाहों जातां झालें तद्रूप । ५.