【民視台灣學堂】講台語當著時:變調的理由與不變調的問題 2017.9.7-林佳怡、陳豐惠

[@shiangshiouhu5750]

《講台語當著時》第二季．第2集：變調、輕聲蓋趣味 2017.09.07 (上)
.
語言是文化的底蒂
文化是建國的根基
.
一、變調、輕聲蓋趣味
◎變調有啥物作用？
．因為有聲調的語言，佇全世界來講，已經是無蓋濟，有聲調閣有變調的語言閣較少。
　　　　
◎是按怎會有變調？
．無變敢袂使？
　有的語言學家感覺這个問題實在是真值得研究，可能是變調以後，唸起來會較順，
　毋過這是講袂得過。
　因為有變調的語言變出來以後，高低音嘛無仝款，你欲講佗一種較順咧？
．變調是咱的語言內底，是真正有存在的一个現象，語言學家共伊記錄落來了後，
　發現伊有規則，不是”人”規定出來的，是咱真正就是按呢講話。
.
◎講話敢真正照變調？
　有喔！而且是你愈捷講台語的人，你的變調的情形，就愈符合咱的規則。
◎若無照規則變調會按怎？
．咱大約仔攏聽有，只是這个人(講話)變調若是無正確，你聽著會感覺講話怪怪。
．如果有的時陣，你的變調若是變毋著去，意思確實會無仝。
.
＊我毋願佮伊拚。
a) Guá m̄-guān kah i piànn. (“願”有變調。)
　這个”願”有變調，變做”毋願”按怎，表示後面猶未講了。
　毋願按怎的代誌，囥佇後面。表示我無想欲佮伊拚。
b) Guá m̄-guān, kah i piànn. (“願”無變調。)
　如果”願”唸本調，變做”我毋願，佮伊拚！”
　我感覺”我毋願”，”足毋甘願”，所以我欲去佮伊拚。
　”我毋願”到遮結束矣，後面是另外一回事。
　 ﹡這个”願”，一个有變調，一个無變調，意思都無仝矣。
　　一个是欲去佮伊拚，一个無愛佮伊拚。
--------------------
＊歹勢無共你招。
a)Pháinn-sè bô kā lí tsio. (“勢”有變調。)
　有共你招，我其實本來無想欲共你招，但是感覺足歹勢。
　歹勢無共你招，只好來共你招一下。
　　　　
b)Pháinn-sè, bô kā lí tsio. (“勢”無變調。)
　歹勢，結束矣，後面是另外一件代誌。
　歹勢啥咧？歹勢啦，無共你招。
　﹡這个”勢”，一个有變調，一个無變調，意思完全無仝款。
--------------------
＊我毋敢予你去。
a)Guá m̄-kánn hōo lí khì. (“敢”有變調。)
　“敢”有變調，表示後面猶未講了。
　“我毋敢”按怎？”我毋敢”的代誌是啥？
　“我毋敢”予你去，所以你莫去，我去抑是別人去。
　　　　
b)Guá m̄-kánn, hōo lí khì. (“敢”無變調。)
　“我毋敢”，你去，你去，所以是你去，我無去。
　我毋敢，予你去。
　﹡這个”敢”，有變調，無變調，意思無仝。
◎變？無變？就是問題！
．欺騙你的朋友Khi-phiàn lí ê pîng-iú.
　a)有變調：你共你的朋友欺騙，你共騙。
　b)無變調：Khi-phiàn--lí-ê pîng-iú.　你有一个朋友，這个朋友共你騙。
　　　　　　伊就是欺騙你的彼个朋友。
　　　　
．愛你的愛人Ài lí ê ài-jîn.
　a)有變調：伊是你的愛人仔，所以你愛共伊愛。
　b)無變調：Ài--lí-ê ài-jîn. 　你的愛人足愛你的，你可能有幾若个愛人，其中一个愛你，
　　　　　　另外一个無愛你，愛--你的彼的愛人。
　　　　
　﹡你若是用華語來唸，仝一个聲音，伊有可能有兩種意思。
　　若是台語，兩種意思唸起來，聲音是無仝款的。
．佮意你的同事Kah-ì lí ê tông-sū.
　a)有變調：彼的同事你真佮意伊。
　b)無變調：Kah-ì--lí-ê tông-sū.　你有真濟同事，其中有一个佮意--你的彼的同事。
　　　
．拍我的囡仔Phah guá ê gín-á.
　a)有變調：共你的囡仔拍。
　b)無變調：Phah--guá-ê gín-á.　遐有真濟囡仔，其中彼的是拍--我的囡仔。
　
．咬我的狗Kā guá ê káu.
　a)有變調：伊就是共我的狗咬，我有一隻狗，彼隻狗咬我的狗。
　b)無變調：Kā--guá-ê káu.　遐有真濟隻狗，其中一隻是咬--我的彼隻。
．遮的衫攏總200箍Tsia-ê sann lóng-tsóng 200 khoo.
　a)有變調：遮可能有幾若種衫，遮有一疊，遐有一疊，
　　　　　　遮的攏總200箍，這个嘛200，彼的嘛200。
　b)無變調：lóng-tsóng，是你買遮的衫，加起來全部200箍。
.
◎變調按怎學
．自然學：上蓋好的就是咱自然學。語言其實就是你自然聽、自然講，
　　　　　佇咧講的過程當中，你就會學著正確的講法，這當然是上蓋好的。
　　　　　毋過因為咱這馬的環境，可能你無法度隨時攏會當自然來學語言，
　　　　　這个時陣，你若是拄著新詞的時陣，像咱拄才講的彼的例，
　　　　　你著愛特別練。
．變調的規則：學新詞的時陣特別練
　　1、5 → 7 → 3 → 2 → 1　　　 p、t、k：4 → 8
　　　　　　8h↗　4h↑　　　　 　p、t、k：4 ← 8
　共遮的規則記起來，複習一下，拄著一个新的詞，抑是新的話句，咱就特別共伊記，
　記講這个音應該愛按怎唸。
　　　　
．利用標記：
　有的所在愛唸本調，有的所在愛唸變調，若聽過就袂記得矣，欲按怎？
　就是利用標記”#”，表示符號頭前彼字愛唸本調，賰的愛唸變調，輕聲是另外。
　就”變調”佮”本調”來講，有符號的彼字愛唸伊的本調。
　　 -遮的衫#攏總#200箍#
　　 -遮的衫#攏總200箍#
.
◎台語華語哪會仝音？
．遮的詞台語按怎唸？
　霸凌、印尼、變遷、菜包、漢醫、變通、太空、泰安、進攻、泰山跳愛河
　﹡遮的華語的唸法竟然佮台語的唸法仝音，基本上是差不多完全仝款的。　　　　
　﹡台語的聲調，其中有幾个聲調，是華語佮台語仝款攏有的。
　　
．台語聲調： 1、 2 ← 3、 4、 5、 6、 7、 8
　例　　字：衫、短、褲、闊、人、矮、鼻、直
．華語聲調： 1、 4 、 3 、　　2
　例　　字：媽、罵、馬、　　麻
　　　　
　﹡像講第1調，”衫”佮”媽”仝聲調，”人”佮”麻”嘛是仝聲調。
　 a)只要這兩个聲調囥佇咧上尾字，按呢就有機會。
　 b)只要伊頭前彼字是第三調，變調以後，變做第二調，按呢伊就會佮華語的第四調仝音。
　　只要有這種條件，台語唸起來，會佮華語仝音。這就是變調趣味的所在。
　　　　
◎輕聲的鋩角(mê-kak)
＊動詞 + (出、入、起、落、過)來、去
　有徙位的動詞，像講行、飛、搬、走，遮个動詞，後面你攏會當加遮的詞，遮的字，
　加lueh(落下)了後，你就愛唸輕聲。
．行--出來、行--出去；
　入--來、入--去；
　起--來、起--去；
　落--來、落--去；
　過--來、過--去。
　★行--起去：行”起去khí-khì”歹唸，就簡化變做”起去khí-lì”。
　﹡若是佇咧後面，有閣加物件的時陣，
　　行--出去 → 行出去遐。”行、出、去”攏有變調。
　　　　
＊動詞 + 一下
．看--一下，”一下”是輕聲，看是本調。
　看一下仔伊咧創啥，頭前這幾字都變調去矣。
　　　　
＊動詞 + 著：有三種無仝款的情形，逐家愛分予清楚。
a)聽--著：”聽”本調，”著”輕聲。
　-你有聽著無？
　-有，我有聽--著。
b)聽著聲：”聽”變調，”著”變調，”聲”本調。
　-你聽著啥物？
　-我聽著聲。
c)聽著真艱苦『聽了覺得很難過』
　-這條歌我聽著真艱苦。”聽”變調，”著”本調。
(待續)

[@sayingwong182]

感謝林佳怡老師，講得很仔細 也很優雅 讓我愛上台語(≧∇≦)

[@林麗君-e5s]

好有趣🤔！

[@taiwanfree1080]

變調的語言，唱歌比較好聽。 比較台語歌與國語歌就知道！ 國畫國樂比較單調，而西洋畫西洋音樂變化多，就是有這種語言的多變化成分。

[@kaeruhxu3890]

雖然不懂規則，但
我幾乎都聽得懂

[@陳俊銘-m8n]

先想想自己
在家有沒有跟孩子說母語

[@alexandersupertramp0621]

這集好難！發現平常都沒在注意變調

[@Tsìng-hiôngLîm]

2024/07/07(日)
tsit e5 chiat-bok8 chin-ho2!台語文
書寫用本調,唸讀自然chhiau5,變調有技巧
1-7-3-2-1/5-3kah5-7/這是變音轉調,另外
抑有便音轉調:
-h4~2/-h8~3;
-h4~1:桌仔kha1(腳)
-h8~3:食8~3飯77
掠兔仔=liah8~3
-thoo3~1-a22。

[@かどDノバイオリンだいすけのヸオロン]

變調真的好難學

[@ashe792]

桃花過渡

[@正雄林-k1h]

2022/09/21 masaoo
ti7 Tong-hong kok-tiong hau7-lai7 khuann3 tsit-e5 pin5-to7.....

[@sgtK0420]

6:38

[@燕輝梁]

霸凌=欺負恐嚇

[@YummYakitori]

语言还是多讲多听最容易学得到。。