"Өбүгэ ситимэ" кинигэ презентацията, Бороҕон с, 13.12.2024. 2 чааһа.

Бээрийэ нэһилиэгин «Арчы» туосчуттар түмсүүлэрэ 30 сыллаах үлэтин көрдөрөр кинигэни биһирэмнээтэ
Мүрү саһарҕата, 14.12.2024
Уус Алдан улууһун Бээрийэ нэһилиэгин «Арчы» туосчуттар түмсүүлэрэ 30 сыллаах үлэтин көрдөрөр «Өбүгэ ситимэ» кинигэ сүрэхтэниитэ бэҕэһээ В.В. Никифоров-Күлүмнүүр аатынан «Тойон Мүрү» култуура дыбарыаһыгар буолла.
Үбүлүөйдээх тэрээһин туосчуттар өр сыллаах киэҥ далааһыннаах айар үлэлэрин билиһиннэрэр быыстапкаттан саҕаланна. Быыстапканы Бээрийэтээҕи библиотека сэбиэдиссэйэ Туяра Никифорова толкуйдаан туруорда, онно улуус киин библиотекатын үлэһиттэрэ бэчээтинэй таһаарыылары билиһиннэрэр стендэнэн кыттыстылар. Онон тэрээһин кыттыылаахтарын бэрт сиһилии матырыйааллаах баай быыстапка кэрэхсэттэ.
«Өбүгэ ситимэ» кинигэ биһирэмин үөрүүлээх чааһын улуустааҕы кииннэммит библиотека тиһигин уонна Бээрийэтээҕи «Арчы» сынньалаҥ киинин кэлэктииптэрэ иилээн-саҕалаан ыыттылар. «Арчы» түмсүү 30 сыллаах айар үлэтин билиһиннэрэр кинигэ сүрэхтэниитигэр ыраахтан-чугастан бииргэ алтыспыт дьоно мустан эҕэрдэлээтилэр. Ол курдук, Дьокуускай куораттан Саха Өрөспүүбүлүкэтин «Симэх» национальнай киинин директора Яна Игнатьева, Сунтаар улууһун С. Зверев аатынан түмэл директора Альбина Федорова, музей харааннааччыта Эмма Васильева, Дьокуускай куораттан «Сайсары» туосчуттар түмсүүлэрэ, Табаҕа музыкальнай оскуолатын директора Лариса Каратаева, «Бээрийэ» түмсүү салайааччыта Екатерина Турантаева кэлэннэр истиҥ-иһирэх тыллары эттилэр.
Түмсүү 30 сыллаах айар үлэтэ сыаналанан, туосчуттар үрдүк наҕараадалары тутан чиэстэннилэр. Ол курдук, Саха Өрөспүүбүлүкэтин Правительствотын махтал суругунан Александра Колесова, Марианна Арсентьева, Саха Өрөспүүбүлүкэтин Судаарыстыбаннай Мунньаҕын (Ил Түмэн) култуураҕа уонна наукаҕа комитетын бочуотунай грамотатынан Зинаида Васильева бэлиэтэннилэр. Ону сэргэ «Саха Өрөспүүбүлүкэтин үөрэҕириитин туйгуна» аат - Елизавета Семеноваҕа, «Саха Өрөспүүбүлүкэтин норуотун маастара» аат - Парасковья Васильеваҕа, «Саха Өрөспүүбүлүкэтин уус-уран оҥоһуктарын маастара» аат Прасковья Васильеваҕа ананна, «Симэх» национальнай киин грамотатынан Анна Турантаева наҕараадаланна, дьахталлар Бүтүн Россиятааҕы «Матери России» хамсааһыннарын Саха сиринээҕи салаатын бэрэссэдээтэлэ Прасковья Борисова махтал суругун Зинаида Васильева тутта, Саха Өрөспүүбүлүкэтин профсоюһун федерациятын бэрэссэдээтэлэ Николай Дегтярев бочуотунай грамотатынан Марианна Арсентьева бэлиэтэннэ, «Уус Алдан улууһун социальнай-экономическай сайдыытыгар кылаатын иһин» бэлиэнэн Александра Колесова, Ольга Томская наҕараадаланнылар, «Уус Алдан улууһугар культура сайдыытыгар кылаатын иһин» бэлиэни Светлана Васильева тутта уонна «Бээрийэ нэһилиэгин бочуоттаах олохтооҕо» аат Зинаида Васильеваҕа, Екатерина Васильеваҕа иҥэрилиннэ, «Бээрийэ нэһилиэгин социальнай-экономическай сайдыытыгар кылаатын иһин» бэлиэни Парасковья Васильева тутта.
Ити курдук саха омук биир төрүт дьарыгын сөргүтэн өрөспүүбүлүкэни ааһан дойдуга, тас дойдуларга тиийэ туос оҥоһуктары билиһиннэрбит, улууспутун ааттаппыт, «бээрийэлэр дуо?» дэппит түмсүү эдэр көлүөнэ кыттыылаахтара - мааны кийиит кыргыттар - ытыктыыр, ийэлэрин, эбэлэрин курдук саныыр киһилэриттэн Варвара Тихоновна Васильеваттан алгыс ылан, салгыы өссө хорутуулаахтык үлэлииргэ, үүнэн-сайдан иһэргэ кынаттаннылар.