"Өбүгэ ситимэ" кинигэ сүрэхтэниитэ, Бороҕон с, 13.12.2024. 1-кы чааһа.

Уус Алдан улууһун Бээрийэ нэһилиэгин «Арчы» туосчуттар түмсүүлэрэ 30 сыллаах үлэтин көрдөрөр «Өбүгэ ситимэ» кинигэ сүрэхтэниитэ бэҕэһээ В.В. Никифоров-Күлүмнүүр аатынан «Тойон Мүрү» култуура дыбарыаһыгар буолла.
Үбүлүөйдээх тэрээһин туосчуттар өр сыллаах киэҥ далааһыннаах айар үлэлэрин билиһиннэрэр быыстапкаттан саҕаланна. Быыстапканы Бээрийэтээҕи библиотека сэбиэдиссэйэ Туяра Никифорова толкуйдаан туруорда, онно улуус киин библиотекатын үлэһиттэрэ бэчээтинэй таһаарыылары билиһиннэрэр стендэнэн кыттыстылар. Онон тэрээһин кыттыылаахтарын бэрт сиһилии матырыйааллаах баай быыстапка кэрэхсэттэ.
«Өбүгэ ситимэ» кинигэ биһирэмин үөрүүлээх чааһын улуустааҕы кииннэммит библиотека тиһигин уонна Бээрийэтээҕи «Арчы» сынньалаҥ киинин кэлэктииптэрэ иилээн-саҕалаан ыыттылар. «Арчы» түмсүү 30 сыллаах айар үлэтин билиһиннэрэр кинигэ сүрэхтэниитигэр ыраахтан-чугастан бииргэ алтыспыт дьоно мустан эҕэрдэлээтилэр. Түмсүү 30 сыллаах айар үлэтэ сыаналанан, туосчуттар үрдүк наҕараадалары тутан чиэстэннилэр.
Саха омук биир төрүт дьарыгын сөргүтэн өрөспүүбүлүкэни ааһан дойдуга, тас дойдуларга тиийэ туос оҥоһуктары билиһиннэрбит, улууспутун ааттаппыт, «бээрийэлэр дуо?» дэппит түмсүү эдэр көлүөнэ кыттыылаахтара - мааны кийиит кыргыттар - ытыктыыр, ийэлэрин, эбэлэрин курдук саныыр киһилэриттэн Варвара Тихоновна Васильеваттан алгыс ылан, салгыы өссө хорутуулаахтык үлэлииргэ, үүнэн-сайдан иһэргэ кынаттаннылар.