San Juan 19, 28-37. Miércoles 15 de enero 2025. Xninq'e Qaawa' Esquipulas.

Miércoles 15 re li po enero 2025. Xninq'e Qaawa' Esquipulas.
San Juan 19, 28-37.
Naxnaw li Jesus naq ak xtz'aqlok ru chixjunil; jo'kan naq kixye: --Taachaqiq we. Kixye a'in re naq chitz'aqloq ru li tz'iib'anb'il sa' li Santil Hu. Wank aran jun li sek' nujenaq chi vinaagr. Ke'xk'e jun xmach palaw tz'ab'il sa' vinaagr sa' ru'uj jun li che', ut ke'xtaqsi sa' re. Naq kiruk' li vinaagr, li Jesus kixye: --Xtz'aqlok ru. Kixxulub' li xjolom ut kixq'axtesi li Musiq'ej. Yo li Kawunk re li Paswa naq kik'ulmank a'an; jo'kan naq eb' laj Judiiy ke'xtz'aama chiru laj Pilaat naq che'toqe'q xb'aqeleb' li ra' eb' li winq ut che'isiiq aran, re naq ink'a' te'kanaaq li kamenaq chiru krus sa' sábado, xb'aan naq xnimal kutan li sábado a'an. Koheb' ut laj puub' ut ke'xtoq xb'aqel li ra' li xb'een, jo'kan ajwi' xb'aqel li ra' li jun chik li kik'ehe'k chiru krus rochb'een. Ab'anan, naq ke'wulak wan wi' li Jesus, ke'ril naq kamenaq chik; jo'kan naq ink'a' ke'xtoq xb'aqel li ra'. Jun reheb' laj puub' kixk'ob' li xk'atq xsa' rik'in jun li jutz' ch'iich', ut tikto ki'elk chaq kik' rik'in ha'. Li ki'ilok re, na'aatinak chirix, ut li naxye, a'an yaal; ut naxnaw naq yaal li naxye, re naq texpaab'anq ajwi' laa'ex. Chixjunil a'in kik'ulmank re naq chitz'aqloq ru li naxye li Santil Hu: "Ink'a' taatoqmanq junaq xb'aqel". Naxye ajwi' li Santil Hu: "Te'xka'ya li xe'xk'ob' chi ch'iich'".
Raatin li Qaawa'.