دیوانی مەحوی؛ مەحویا گەر ئەهلی حاڵی حاڵ و ماڵم بۆ چیە؟ [شیعری مەحوی]

کتێب:دیوانی مەحوی
بەرهەم:مامۆستا مەحوی
قاڵب:غەزەڵ
خوێندنەوە:بێهزاد موحەممەدی
[ telegram:t.me/behzadakurd ]
سەر کە جۆشێکی نەبێ، من زرکە تاڵم بۆ چیە!
دڵ کە هۆشێکی نەبێ شیشەی بەتاڵم بۆ چیە!
دەرد و داغێکی دەروونی گەر ببێ، با ڕەنگ و ڕوو
سیس و موغبەڕ بێ، کەماڵم بوو جەماڵم بۆ چیە!
تەجرەبەی عاشق بە سووتانی دەکرد ئەو زاڵمە
سەیری کەن ئێستا دەڵێ: مشتێ زوخاڵم بۆ چیە!
پێیی بە سەرما نا کە بوومە خاکی ڕێی، گەردم شوکر
گەییە داوێنی، دەڵاڵی بای شەماڵم بۆ چیە!
داخی سینە و پێچ و تابی دوودی ئاهم خۆ هەیە
مۆر و توڕڕەی ئینپەراتۆر و قەڕاڵم بۆ چیە!
خەڵق ئەوا مەجبووری دوو خۆخستنی خەڵقن بە جان
من بە دڵ مەنفوورمە، ڕوتبەی جەجاڵم بۆ چیە!
ماڵە پیتکێنێیە ماڵ و گەینە حاڵی خۆیە حاڵ
من کە وا حاڵی بم، ئیتر ماڵ و حاڵم بۆ چیە!
پڕ بە پێ زنجیری شێتی، داغی سەودا پڕ بە سەر
سەیری حاڵی خۆمە، سەیری زوڵف و خاڵم بۆ چیە!
دەردەدار ئەڵبەت زوبانی دەرد و حەسرەت تێ دەگا
چاوی بیماری دەزانێ، ناڵە ناڵم بۆ چیە!
دڵ گلە و شەکوەی لە ئەشکەنجەی عەزابی زوڵفی یار
کرد و ئەو فەرمووی: ئەی زنجیری زاڵم بۆ چیە!
حاڵە بەدحاڵی لە شوێن و ماڵە وێرانی لە دوو
مەحویا! گەر ئەهلی حاڵی، حاڵ و ماڵم بۆ چیە!
≣لێکدانەوە و لێکۆڵینەوەی مامۆستا عەبدولکەریمی مودەڕڕیس و موحەمەممەدی مەلا کەریم
1)زرکەتاڵ: کاڵەکی نەگەیشتوو کە هێشتا تاڵ تفتە.
واتە:سەر ئەوکاتە بەڕاستی سەرە کە سەودای عیشقی تێدابێ.ئەگینا هیچی لە زرکەتاڵ زیاد نابێ کە کەڵکی هیچی پێوە نییە.دڵیش ئەوکاتە دڵی ڕاستییە،کە هۆش و تێ گەیشتنی هەبێ، ئەگینا جیاوازی نابێ لە شووشەی بۆش.
2)موغبەڕ:تۆزاوی
واتە:ئەگەر دەروونم دەرد و داخی دڵداری تیابێ مەبەستم نییە ڕەنگ و ڕووم سیس و وەك تۆزاوی زەرد بێ،چونکە دەردەداریی عیشق نیشانەی پێگەیشتنە و مرۆی پێگەیشتووش جوانی سەروسیمای مەبەست نییە.
3)ئەو یارە ستەمکارە ڕاستیی خۆشەویستی دڵدارەکەی خۆی بەوە تاقی دەکردەوە کە ئاگری پێوەبنێ، کە لێیش دەبووەوە لە سووتاندنی،گوێی نەدەدایە و دەیوت ئەم مشتە خەڵووزەم بۆچییە؟!
4)کەبووم بە خاک و لەسەر ڕێی یاردا کەوتم وپێی پیانام و تۆزەکەم گەیشتە داوێنی،ئیتر تازە نامەوێ بای شەماڵ ببێ بە دەڵاڵم و ڕێگام پێشان بدا بۆلای یار و تۆزم هەڵگرێ بیدا بە داوێنیا
5) لە سایەی داخی خڕی سینەم و هەناسەی هەڵکشاوی پێچ و لوولمەوە بووم بە پادشا و هیچ پێویستم بە مۆری خڕ و تواغری پێچ پێچی ئەمپەراتۆر و قەراڵەکان نییە.
6)خەڵک بە دڵ و بە گیان حەزیان لەوەیە خەڵکی تر بخەنە دەری خۆیان، بەڵام من ئەم خەڵک شوێن کەوتنەم وەك شوێن کەوتنی دەجاڵ دێتە پێش چاو و هیچ حەزم ڵێی نییە.
7)ماڵی دنیا وەک ماڵەقۆڵەی مناڵان وایە و چۆنیەتیی وەزعیش ئەنجامەکەی مردنە، جا من کە لەمە تێگەشتبم،ئیتر دەبێ ماڵ و حاڵم بۆچی بێ
8)لەبریتی سەیری زوڵفی یار، سەیری ئەو زنجیرانەی شێتی دەکەم کە لە پێمدان و لەبریتی سەیری خاڵی،سەیری ئەو داخانەی سەودا دەکەم کە بە سەرمەوەن.
9)چاوی نەرمی یار تێ‌دەگا من بۆچی دەناڵێنم، چونکە چاوی نەرم پێییشی دەوترێ بیمار و، بیمار و دەردەداریش یەك مەعنایان هەیە و مەسەلەی کوردیش دەڵێ: دەردەدار ئاگای لە حاڵی دەردەدارە
10)یار لە وەڵامی گلەیی و شکاتی سزای زوڵفی یاردا وتی: ئەی ئەگەر زوڵفم بۆ ئازاردانی دڵداران نەبێ، بۆچیمە!؟
11) بەیتی 7 و 11 لەیەک جۆر مەعنی ئەچن

[@sol.vaj12]

بەڕاستی کارێکی جوانت کردوە🩵