Popatik - Eskalearena (feat. Aitor Furundarena)

P🟢PATIK bandaren kanta bat *
Musika: Xabier Crehuet
Hitzak: Ekaitz Goikoetxea
Ahotsa: Xabier Crehuet
Akordeoia: Aitor Furundarena
Ekoizpena: Fredi Pelaez Pottoko Estudioan grabatuta
Diskaren azalaren diseinua: Josu Maroto
============
Eskalearena
============
Hego-haize epela, ilargi betea,
hiru zentimetroko irrifar merkea,
bihotzetik atera gabeko arantza
ilusiora heltzen ez den esperantza…
Neuk utzitako hiru xentimo lurrean,
atzoko belarri ta begien aurrean
odolaren mintzoa hastean kantari
potroetatik heltzen diot bizitzari:
Farola argiontzi,
lurra zerupe,
ametsak saltzen ditut
loaren truke…
Ni maite ez nautenek
nor maite dute?
Iparrari hegoak, hegoei iparra,
sentimenduei hitza, hitzari indarra,
gezurrari egia, gerrari bakea,
argiari leihoak, leihoei atea…
Gurasoei ipuinak, umeei kilimak,
paretei grafitiak, poetei errimak,
gauerdiko itzalei besarkada bana
ta kantu hau da zuri dakarkizudana:
Farola argiontzi,
lurra zerupe,
ametsak saltzen ditut
loaren truke…
Ni maite ez nautenek
nor maite dute?
Utikan metaforaz puztutako hitzak!
Utikan zilarrezko panpinen bizitzak!
Egunkarietako lehenengo orriak,
luxuzko hotel eta alfonbra gorriak!
Eguneroko plazer txikien maitale,
ez naiz kontrabandoko mozorroen zale,
aldean daramatzat aldarri guztiak
malko lehorrak eta irrifar bustiak:
Farola argiontzi,
lurra zerupe,
ametsak saltzen ditut
loaren truke…
Ni maite ez nautenek
nor maite dute?