Əliağa Vahid qəzəl meyxanələr içrə

Hər kim mənə tən eyləsə meyxanələr içrə
Qan olsun onun badəsi peymanələr içrə
Öz xəlqinə hər kim mey içib versə əziyyət
Olsun yeri bayquş kimi viranələr içrə
Mümkünsə ,fəsad əhli ilə həmqədəh olma
Nöqsan yetirər şəninə biganələr içrə
Pərvanə əgər şəmə yanır atəşi-qəmlə
Məndə yanıram hər gecə pərvanələr içrə
Bir zülfü siyah dilbərə çoxdandır əsirəm
Məşhuram o gündən bəri divanələr içrə
Vahid,biləcək qədrini ,sərraf əgər olsa
Saxlar bu gözəl şerini dürdanələr içrə