ጥር ፳፩ ወረብ ዘአስተርእዮ ማርያም Tir 21 Asterio Mariam Wereb

አመ ፳ወ፩ ለጥር
ወረብ ዘአስተርእዮ ማርያም
እፎኑመ እመ አምላክ በከየት ደንጊፃ በከየት እመ አምላክ፣
ከመ ኲሉ ሰብእ ሞት ሶበ ሐወፃ በከየት።
ለዛቲ ድንግል ሠረቀ ላዕሌሃ ብዕለ ጸጋሁ ለአብ፣
ወአግዓዛ እምእኩይ ውስተ ሠናይ እሞት ውስተ ሕይወት።
አንጺሖ ሥጋሃ አንጺሖ ሥጋሃ ላዕሌሃ ኀደረ፣
ቀዲሶ ኪያሃ ሃሌ ሉያ ሃሌ ሉያ ይቤላ ለድንግል።
ወስኑሰ ለያዕቆብ ዘይቤ ዘይቤ ያዕቆብ፣
ይእቲ ሥጋ ይእቲ ሥጋ እማርያም እንተ ነሥአ መድኅን።
ጊዜ ዕረፍታ ለማርያም ጊዜ ጊዜ ጊዜ ዕረፍታ ለማርያም፣
ወረደ ወልድ ዲበ እምዲበ ልዕልና ወረደ።
እምድንግል ተወልደ እምድንግል ተወልደ እሙነ ኮነ፣
በሠላሳ ክረምት ተጠምቀ ተጠምቀ በዮርዳኖስ።
ወረብ:ዘአ
አምላክ ኀደረ አምላክ ኀደረ ውስተ ሥጋ ተአቊረ እንዘ ኢይትጋባዕ አምላክ ኀደረ፣
ዘድንግል መናሥግተ ኢያርኂዎ ኢያርኂዎ ኢርእዮ ዘኪሩቤል።
ዘመንበሩ ዓቢይ መንበሩ ውእቱ መንበሩ ዘኪሩቤል፣
ያቀድም አእምሮ ሕሊና ሰብእ።