Mien Sermon by Yauzsing: Nqa'haav Nyei Sic (Eschatology) 9-9-12

Mbuo oix juangc jienv hoqc Hiuv Tin-Hungh fai Sienx Fim Nyei Gorn Ndoqv (Janx nyei waac heuc Theology, janx Gikc waac gorngv Theo-Tin-Hungh Logos-waac fai za'eix) Mbuo oix juangc jienv hoqc taux camv nyungc sienx Tin-Hungh mienh nyei gorn ndoqv (Singx Diex, Singx Dorn, Singx Lingh, Fin-mienh, Mienv/Saadaan, Mienv, Njoux en, Zuiz, Baamh Mienh, Jiu-Bang, caux Ga'haav Hingv nyei sic). Mbuo hoqc taux mbuo sienx nyei gorn ndoqv fai Tin-Hungh (Theology) weic zuqc Tin-Hungh heuc mbuo hoqc hiuv Ninh (Singx Nzung 46:10), Weic zuqc Ninh se nduqc dauh Zien Ziouv, yaac weic mbuo nyei hnyouv oix hiuv duqv Tin-Hungh. Hoqc hiuv Tin-Hungh se baamh mienh nyei domh gong yaac benx jaaix-jiex nyei gong (Yo^han 17:3; Ye^li^mi 9:23-24; Ho^se^yaa 6:6). Weic Tin-Hungh zeix mbuo daaih maaih Ninh nyei fangx zeiv (Tin deic douh 1:27) mbuo jaa hoqc hiuv Tin-Hungh ziouc jaa hiuv ganh. Hoqc hiuv mbuo sienx nyei gorn ndoqv fai Tin-Hungh ziouc bun mbuo gauh haih ziangh duqv horpc caux doix-dangc nyei maengc, mbuo hnangv haaix nor hiuv fai buatc Tin-Hungh mbuo ziouc hnangv wuov nor buoqc zangc Ninh. Hiuv mbuo sienx nyei gorn ndoqv bun mbuo maaih hnyouv mbuox mienh taux mbuo sienx wuov dauh Tin-Hungh, maaih hnyouv zoux cing-nzengc, ziouc gauh haih ziangh ei jienv Ziouv nyei waac. Mbuo maiv haih hiuv duqv nyungc-nyungc taux Tin-Hungh, mv baac dongh Ninh laauc yaangh mbuox mbuo taux Ninh ganh nyei, mbuo oix zuqc hoqc, bun mbuo haih hiuv, ziouc haih hnamv Tin-Hungh.
Ih hnoi nyei hoc-dauh janx Meiv guoqv waac heuc Eschatology fai hoqc taux nqa'haav nyei sic, maiv gaengh cuotv daaih nyei nyei sic. Tin-Hungh nyei waac bun mbuo hiuv duqv jiex daaih nyei sic, ih zanc nyei sic, caux nqa'haav nyei sic. Laanh laanh mienh fingx fingx mienh sienx taux nqa'haav nyei sic nyei. Mv baac sienx Yesu nyei mienh, maaih Ging-sou mengh nyei bun mbuo hiuv duqv ndangc maiv gaengh cuotv nyei weic bun mbuo hiuv haaix nyungc oix cuotv daaih. Setv mueiz maiv gaengh cuotv nyei se maaih camv nyungc nyei. Mbuo hoqc nyei maaih daic mingh nyei mienh duqv Yesu daaih dorh ninh mbuo, ziangh jienv nyei mienh duqv goiv yienc, domh kouv naanc yiem baamh gen, Yesu daaih nyei da'nyeic nzunc, yietc cin hnyangx nyei guoqv, Mienv nyei hungh caux mienv zuqc dingc zuiz, maiv sienx nyei mienh zuqc dingc zuiz, sienx Yesu nyei mienh duqv caux Ziouv yiem siang lungh siang ndau siang Tin-dorngh. Hnangv Laauc Yaangh 3:3 gorngv nor, Doqc naaiv buonv sou nyei mienh maaih orn-lorqc aqv. Muangx haiz naaiv deix douc daaih nyei waac yaac ei jienv zoux nyei mienh yaac maaih orn lorqc, weic zuqc naaiv deix sic oix cuotv nyei ziangh hoc taux fatv aqv.
For additional resources go to/Maaih zunh doz/nzung yiem:
cpccredding.org...
www.cpccredding...
yauzsing.wordpr...

[@แอปเปิ้ล-ว3ผ]

ວັດ, ້