ДАР ТОҶИКОБОД ЯК ДУХТАРИ ҚАДРАС ВА ДАР ПАНҶАКЕНТ ЯК ҶАВОНИ МАЪЮБ ҒАРҚ ШУДАНД

Гармои шадиде, ки дар Тоҷикикистон ҳукмфармост, одамонро дар ҷустуҷӯи макони салқин мисли оҳанрабо ба соҳили кӯлу дарёҳо мекашад. Вале агар мардум ба қоидаҳои оддии бехатарӣ беэътиноӣ зоҳир кунанд, об метавонад ба душмани ҷони инсон табдил ёбад.
Кумитаи ҳолатҳои фавқулоддаи Тоҷикистон хабар дод, ки рӯзи 25 июни соли 2024 боз ду сокини ҷавони ҷумҳурӣ дар об ғарқ шудаанд, аз ҷумла як духтари 17-сола аз Тоҷикобод ва як ҷавони маъюб аз Панҷакент, ки ҳамагӣ 23 сол дошт.
Бино ба хабари қисми навбатдории Кумитаи ҳолатҳои фавқулодда, 25 июни соли равон, тахминан соати 13:00, як сокини 17-солаи деҳаи Шинги ҷамоати деҳоти Зарафшони ноҳияи Тоҷикобод ба дарёи Сурхоб афтода ғарқ шудааст. Сабаби ҳодиса дақиқан маълум нест. Ҷасади ин духтари 17-сола пайдо ва ба волидонаш супурда шуд.
Ҳодисаи дуюм дар шимоли кишвар рух дод. Рӯзи 25-уми июн, соати 14:00 як сокини деҳаи Рӯзии ҷамоати деҳоти Ёрии шаҳри Панҷакент хабар дод, ки фарзанди маъюби 23-солаи ӯ ҳангоми ҷамъоварии ҳезум дар соҳили дарёи Зарафшон пояш лағжидаву ба дарё афтодааст.
Фаврӣ ба ҷойи ҳодиса наҷотдиҳандагони Кумита дар навоҳии водии Зарафшон расиданд. Ҷустуҷӯи ҷасади номбурда то фаро расидани торикӣ идома кард, вале натиҷа надод. Субҳи рӯзи 26-уми июн талошҳо барои пайдо кардани ҷасад аз сар гирифта шуданд.
Бино ба омори расмии Кумитаи ҳолатҳои фавқулодда, тайи соли 2023 дар обҳои Тоҷикистон 181 нафар, аз ҷумла 75 кӯдаку навраси то синни 16 ва 36 зану духтар ғарқ шудаанд. Соли 2022 дар Тоҷикистон 160 нафар, аз ҷумла 80 кӯдаку навраси то синни 16 ғарқ шуда буд. Аз аввали соли ҷорӣ дар бораи дар кӯлу дарёҳои Тоҷикистон ғарқ шудани тақрибан 80 нафар хабарҳо ба даст расидаанд, ки тақрибан нисфи онҳоро кӯдакону наврасони то синни 16 ташкил медиҳанд.