گفتوگۆی باڵۆن - بزانە مەلا کرێکار کتێبەکانی محەممەدی حاجی مەحموودی بۆچی بەکاردەهێنا؟

محەممەدی حاجی مەحموود - بەشی یەکەم
• چیرۆکی وەرگرتنی 400 هەزار دۆلار لە مام جەلال بۆ چوار حیزبەکە. خولەکی 17:00 تاوەکو 20:00
• وەرگرتنی ملیۆنێک دۆلار لە قاسم سولەیمانی. خولەکی 12:00
ساڵ 2009 چوار حیزب، كە دووانیان ئیسلامی ‌و دوانەكەی دیكەشیان ‏خۆیان بە عەلمانی دەناسێنن، (یەكگرتوو ‌و كۆمەڵ ‌و سۆسیالیست‌ و ‏زەحمەتكێشان) بە یەك لیست بەناوی لیستی خزمەتگوزاری و چاكسازی ‏بەشداری هەڵبژاردنی پەرلەمانی كوردستان دەكەن، هەر ئەو كاتە هەڵبژاردن ‏بۆ پۆستی سەرۆكی هەرێمی كوردستانیش دەكرێت، ئەو چوار حیزبە بە ‏فەرمی هیچ بەربژێرێكیان بۆ ئەو پۆستە نابێت، بەڵام محەممەد حاجی ‏محموود سەرۆكی پارتی سۆسیال دیموكراتی كوردستان، بە نهێنی فۆڕمێكی ‏بەربژێربوون پڕدەكاتەوە. مام جەلال بەو كارە دەزانێ‌، بۆیە بانگی دەكات ‏پێی دەڵێت دەزانم فۆڕمت وەرگرتووە بۆ دەتەوێ‌ ‏فێڵم لێبكەیت؟.
وەڵامی ‏‏محەممەد حاجی محموود بۆ مام جەلال ئەوە دەبێت كە ئەوە مافێكی خۆیەتی، ‏بەڵام مام جەلال پێی دەڵێت "ئەگەر كارێكی وەها بكەیت پێشمەرگەكانی ‏یەكێتی دەنگ بە تۆ دەدەن ‌و بەو جۆرە كێشە لە نێوان پارتی ‌و یەكێتی ‏دروست دەبێت". چونكە ئەو كاتە پارتی ‌و یەكێتی یەك بەربژێریان بۆ ئەو ‏پۆستە هەبوو ئەویش سەرۆك بارزانی بوو. مام جەلال پێشی دەڵێت ئەگەر ‏لە‌و كارە پەشیمان ببیتەوە 400 هەزار ‏دۆلارت دەدەمێ‌، بە گوتەی محەممەدی حاجی مەحموود ئەو ‏كاتە پارەكە رەتدەكاتەوە، بەڵام لە كاتی گەڕانەوەی بۆلای سێ‌ ‏سەركردەكەی دیكەی لیستەكە كاتێك پێیان دەڵێت خۆی بەربژێر دەكات، ‏ئەوان بەو كارە ناڕازی دەبن، مامۆستا سەڵاحەدین ئەمینداری گشتیی یەکگرتووی ئیسلامی، پێیدەڵێت ئەگەر خۆت ‏كاندید بكەیت ‏لیستەكە هەڵدەوشێنینەوە. هەر بەپێی قسەی محەممەد ‏حاجی محموود كە لە بەرنامەی گفتوگۆی باڵۆنەدا ئاشكرای كرد‏ لەسەر ‏رەزامەندی هەر چوار حیزبەكە، بەرامبەر خۆكاندید نەكردنی بۆ ئەو پۆستە، ‏مام جەلال 400 هەزار دۆلاری بۆ ناردوون "بەو جۆرە هەر ‏حیزبێك ‏‏‏100هەزار دۆلارمان وەرگرت.''
محەممەد حاجی محموود، جەخت لەوەش دەكاتەوە، هەر بۆ هەڵبژاردنەكەی ‏‏2009، ئێران لە رێگەی قاسم سولەیمانییەوە بڕی یەك ملیۆن دۆلاری بۆ چوار ‏حیزبەكە ناردووە و دەڵێت "هەر ئەو كاتە حاجی بیلال نوێنەری كۆمەڵ بوو ‏ملیۆنێك دۆلارەكەی لە ئێران ‏وەرگرت".‏
‏محەممەد حاجی محموود، سەرۆكی پارتی سۆسیال دیموكراتی كوردستان ‏باس لەوە دەكات هەندێك لایەن بە نووسینی بیرەوەرییەكانی دڵگران دەبن، ‏دڵنیایی ئەوەش دەدات ئەو كاتانەی لە شاخیش بووە، رۆژانە چی روویداوە ‏بەبێ‌ زیاد ‌و كەم تۆماری کردوون ‌و تەنانەت هەموو ئەو نامانەی لە شاخ بۆی ‏هاتووە یان خۆی ناردوویەتی هەمووی هەڵگرتووە. لە كۆتایی قسەكانی لەم بەشەی ‏بەرنامەی گفتوگۆی باڵۆن محەممەد حاجی محموود جەختی لەوە كردەوە لە ‏كوردستاندا دەسەڵات بەردەوام یارمەتی ئۆپۆزسیۆنی داوە ‏"بەئێستاشەوە ‏دەسەڵات یارمەتی ئۆپۆزسیۆن دەدا".‏