احرف لاعب فى تاريخ مصر | محمد زيدان

زيدان بالنسبالي هو أجمل محترف وأكتر محترف حبيته لأنه كان في حتة تانية لوحده من ناحية المهارة في المراوغة والتسديد بكلتا القدمين والسرعة والرشاقة والخفة.
اللي عمله زيدان في الدوري الدنماركي فترة ميتلاند كان غير طبيعي ولما كنت تتفرج على ماتشاته وأهدافه هناك كنت تحس لوهلة إنك بتتفرج على رونالدو البرازيلي.
فترة ألمانيا كانت جميلة جداً لزيدان خاصة فترات تواجده مع كلوب سواء في ماينز أو دورتموند وحقيقي أغبى قرار خده زيدان إنه ساب توماس توخيل " مدرب تشيلسي الحالي " بعد ما كان متألق معاه في ماينز في آخر مواسمه في ألمانيا وفضل يروح الدوري الإماراتي !!
أهداف زيدان ما باعرفش اختار أجمل هدف فيها لأن تقريبا كلها أحلى من بعضها، يعني مع منتخب مصر هتختار هدفه الأول في الكاميرون ولا التاني ؟ طب وهدفه في الجزائر في الكان 2010 لأ استنى ونسيت هدفه الرائع في المقص مش فاكر في موريتانيا ولا بوروندي حد يفكرني كان في استاد القاهرة ؟
دة غير هدفه التاني بشماله في البرازيل وهدفه في ويمبلي في إنجلترا لما وقف الكورة بمعلمة وحطها بمعملة أكبر كأنه بيشوط ضربة جزاء علشان الكورة تسكن الشباك ؟
كل دة بقى وما اتكلمتش عن أهدافه في مسيرته الاحترافية اللي مليانة فعلاً أهداف خرافية سواء في الدنمارك أو ألمانيا ومنها في مرمى حراس عظام زي نوير و أوليفر كان.
#محمد_زيدان
#محمد_صلاح
#الدوري_الانجليزي
#المحترفين_المصريين