اول سنه ليك في الكليه - استغلها ازاى؟

ناس كتيرة للاسف بتمر عليها فترة ذهبية من حياتها بدون ماتستغلها استغلال صحيح يخدمها فيما بعد بعد ماتتخرج وتدور على شغل علشان كده لازم تستفاد من المقالة دى وتحاول تبعتها لزميلك اللى لسه داخل جامعة او اللى مش مقدر اهمية المرحلة دى من حياته او غافل عنها لعل الكلمات دى تساعده ان شاء الله ..‫#‏قواعد_الجامعة_الأربعون‬ مقال من خلاله هنعرف ازاى نستغل فترة الجامعة استغلال كويس جدا ان شاء الله.
نبدأ فى القواعد تباعاً ^^
1- انسى جو الثانوية العامة نهائى .. بمعنى الحياة الجامعية مش حفظ مواد وانك تنجح فى اختبارات وخلافه الموضوع اكبر من كده بكتير.
2- الجامعة مش محاضرات وسكاشن .. ضحكوا عليك وفهموك ان الجامعة بالشكل ده.
3- الكلية مش كل حاجه بمعنى حاول تتعلم مهارات جديدة .. تتدرب فى شركة او بنك او مكتب ..الخ .. تشتغل وظيفة تكسب منها فلوس تساعدك انك تطور من نفسك اكتر واكتر.
4- ماتقضهاش فى الكلية لانك انت اللى هتكون خسران فى النهاية فيابنى الحلال ركز على مستقبلك وفكك من اللى بتعمله فى الكلية.
5- ركز فى السنة الأولى على دراستك بمعنى اثبت كده وزاكر كويس على ماتفهم الوضع فى كليتك عامل ايه والدنيا ماشية ازاى علشان متتصدمش.
6- اعمل مجموعات سيلف استدى انت وزميلك وزاكروا المواد بتاعتكوا مع بعض وبلاها كورسات احنا مش فى ثانوية عامة يابنى.
7- تقديرك لوحده مش كفاية بمعنى انك متفكرش علشان جبت امتياز يبقى هتلاقى الشغل منتظرك فى البيت والعكس صحيح لاكن التقدير مهم تطلع على الاقل بجيد من الكلية.
8- اقرأ اكتر عن مجال اللى بتحبه وناوى تتخص فيه لان دى فرصة قدامك انت مش وراك حاجه انك تقرا يوميا وتطلع على كل جديد فى المجال بتاعك.
9- مهم انك تكون محدد انت حابب تشتغل فى ايه وليه ؟ ودى تقدر تعملها خلال سنوات دراستك فرصة كويسة انك تكتشف الموضوع ده من بدرى.
10- مهم انك يكون ليك تأثير ايجابى وسط زميلك ودفعتك لان خير الناس انفعهم للناس.
11- الكلية فترة ذهبية لازم تستغلها استغلال صح عن طريق الكلام اللى فوق واللى جاى.
12- كويس انك تحصل على فرصة تدريب صيفى بس مش نهاية العالم هى عادى بس لو حصلت على التدريب استفاد منه على قد ماتقدر مش تروح تصور ورق هناك وتاخد شهادة انك مغفل فى نهاية التدريب.
13- اعمل بلان واضحة لنفسك انت عاوز توصل لفين ؟ وياسلام لو البلان دى انت عامل لنفسك فيها تحليل SWOT وشغال فعلا على نقاط الضعف بتاعتك وبتنمى فيها.
14- لازم يكون عندك سيرة ذاتية مناسبة
15- اتقن وحسن من مهاراتك الشخصية زى مهارات التواصل مع الاخرين , مهارات العرض والتقديم مهارات التفاوض وغيرهم.
16- اتعلم لغة كويس جدا لانها مهمة جدا فى سوق العمل وبتميزك عن غيرك وبتديك ثقة فى النفس كبيرة.
17- اتدرب على اختبارات الإنجلش واسئلة الذكاء والمعلومات العامة علشان تكون مستعد لاى امتحان سواء فى تدريب صيفى او وظيفة مقدم ليها.
18- لازم تتطوع فى نشاط طلابى او عمل تطوعى ومن غير ليه اتطوع وانت تعرف.
19- حاول يكون ليك بصمة فى حياة الناس لان عملك هو اللى هيستمر وتجازا عليه من ربنا.
20- ماتخدش كورس انجليزي اغلب اعلانات الكورسات دى نصب فى نصب خصوصا اللى بيتوزع عليك فى الجامعة زى منحة كامبيريدج وخلافه.
21- بلاش تاخد كورسات اساساً .. لانك ببلاش هتتعلم كل حاجه اون لاين.
22- بلاش تلبس ارجوك فى اى نصباية (كورسات).
23- اتعلم اون لاين وببلاش عن طريق مايسمى بـ MOOC.
24- احضر ايفينتات كتير واستفيد من كل شىء حواليك.
25- احضر على الأقل دفعة فى معا www.maaan.net.
26- فرصتك كبيرة جدا وانت طالب تاخد منحة بره او جو مصر.
27- كون شبكة علاقات تفيدك.
28- حافظ على شبكة علاقاتك ونميها بإستمرار.
29- سافر كتير واعرف ناس اكتر.
30- غير عنوان بطاقتك للقاهرة قبل ماتتخرج.
31- اتمرمتط اكتر توصل اسرع (وان ليس للإنسان الا ماسعى).
32- لازم تستغل المكتبات العامة والأجنبية.
33- احضر معارض التدريب والتوظيف.
34- مهم تعرف عن ريادة الأعمال ؟ ويكون ليك فكرة مشروع او مشروع.
35- البيزينس حلو مفيش كلام !
36- لازم يكون عندك اكونت محترم على لينكدان.
37- اشتغل - جرب واغلط واتعلم مش عيب.
38- خلى عندك بدائل كتيرة.
39- أمن بحلمك وانك هتقدر وفكك من اى حد يشكك فى احلامك وطموحاتك.
40- فى النهاية لازم تكون ذا أثر .. تكون رجل بأمه .. تكون سفيرا للخير.
ازيكوا انا محمد بنداري غرضي من كل فيديو بنزله تطوير تطوير ثم التطوير ليه؟
لان الانسان لو عايش علشان ياكل ويشرب بس يبقي مش انسان لا فرق بينه وبين الحيوانات تماما فانا محتاج منكم تساعدوني اوصل فيديوهاتي لاكبر عدد ممكن من الناس الكومنت بتاعك هيفرق معايا جدا والشير هيفرق اكتر واكتر ........
وده لينك البيدج بتاعتي علي الفيس بوك خش اعملي اد وهقبله علي طول
profile.php?...
وده لينك الانستجرام لو حابب تتعرف علي حياتي الخاصه
elbendary31...
وده لينكدان لو عاوز تعرف شغلي ايه وانا مين وبرضو لو محتاجني في شغل تواصل معايا بعد ما تعرفني من عليه
www.linkedin.com/in/bendaryat
وده لينك اليوتيوب بتاعي
/ @mohamedelbendary
#bendaryat
دمتم بألف خير وسعاده