RubberBand分享海外演出見聞 ❤️與Fans近距離交流展現真性情⭐️⭐️

RubberBand分享海外演出見聞 ❤️與Fans近距離交流展現真性情⭐️⭐️
《Yahoo Lunch K XLive》日前邀來RubberBand與樂迷一同會面，唱出新舊作品之餘，更大玩遊戲，而幾位RubberBand成員除與觀眾們大玩遊戲，亦特別製定了以「見聞」作主題的演唱歌單，並分享歌曲背後的小故事。Live一開首先以《遊車河》熱身，也促使6號回憶起當年拍MV的點滴。他表示：「我當年未有車牌，所以拍《遊車河》MV時只安排其他成員有揸車嘅鏡頭，而且為咗要拍日出嘅畫面，阿正要一早入大潭拍攝。」
其實RubberBand的足跡遍佈世界各地，6號憶述：「感恩樂隊都去過世界各地唔同地方，譬如tour去過西班牙、德國等等，錄音又去過日本、泰國，其中《不如散步》就喺泰國錄音。記得泰國一入夜就傾盤大雨，但有機會同一班音樂上認識嘅朋友去到咁遠地方錄音，其實好幸福。」樂隊接著也隨即送上《不如散步》，觀眾聽得投入之餘，也跟著揮手和大合唱，台上台下頓時連成一線。
除了曾到訪泰國錄音，RubberBand亦曾在日本錄音。6號透露：「當日阿正同《Juntos》大碟其中一位監製Patrick Lui（雷柏熹）帶咗我哋去大阪一個錄音室，同一隊日本爵士大樂隊合作錄音，我同阿偉、泥鯭都係觀摩為主，《¿醒未?》就係喺嗰度錄，而且為咗拍呢隻歌嘅MV，泥鯭喺大阪拍到中暑，結果約咗大家食河豚都食唔到。」唱過《¿醒未?》後，四子又特別分享了眾人的創作靈感來源，其中泥鯭表示：「我俾隊友一迫就有靈感，同埋見到阿正呢排寫好多歌，自己產量都多啲。」這時阿正被問到靈感泉源，他突然佻皮向著主持道：「你今日件衫令我諗起兒童節目《芝麻街》嘅Oscar。」這個彷如突然跳掣的回答，也頓時令觀眾了解到阿正閒時無定向的思緒，致令他創作出教人驚喜的好歌。
在昨晚的《Yahoo Lunch K XLive》中，RubberBand亦帶來了十多年前到訪土耳其後製作的《豬籠墟事變》，以及今年到訪非洲後創作的新歌《讓世界都懂》，阿偉特別分享了早前到訪非洲後的心情，他說：「我哋今次同宣明會去咗非洲索馬利蘭，一個好脆弱嘅地方，無論天氣、糧食、醫療、教育都係面對好多問題，去完返嚟都有好深感受，不過唔可以俾當中嘅無力感發酵，當有力量時要向呢個世界發問。」而最後RubberBand亦送上《Be Right Back》一曲，為這次的音樂見聞畫上圓滿句號。
活動後，RubberBand分享今次歌單構思，6號說：「我哋好好彩可以好多機會去外地錄音或參加音樂節，甚至拍過旅遊特輯，呢啲點滴除咗玩之外，亦都有靈感喺裡面，揀嘅某啲歌都有故事可以講，都幾得意。」這次與樂迷近距離接觸，也讓他們有一番感受。6號表示：「可以咁close都幾開心，同埋喺新地方唱歌，都有佢有趣之處。」阿偉亦道：「同聽眾好近，交流互動都好正，同埋可能揀咗啲唔係好常唱嘅歌，但大家都投入又開心，好好！」
現場打成一片的氣氛也讓阿正難得佻皮，不過他說：「我又冇特別好佻皮，但主持件衫真係好eye catching，所以一直要解決到呢個問題，我先至可以move on到。」阿偉聽到阿正的解釋，也笑言：「所以主持人應記一功，令到阿正展現活潑一面。」至於唱《Be Right Back》時唱到眼濕濕的6號，就坦言：「呢首歌有一定難度，同埋我聽或唱呢首歌時，聽到雙結他solo，就會好感動，當中的確有啲力量喺度。」
走遍世界各地後，RubberBand亦透露他們已開始籌備第11張專輯，泥鯭透露樂隊的計劃道：「已經開始聽緊demo揀緊歌，希望今年可以開始錄音步驟，然後下年可以問世。」
編輯： Andy
==========================
🎤HONG KONG SINGER CHANNEL🎤
💛讓每一個人唱出心聲💛Let Everyone Sing From Their Heart💛
Follow我哋👇🏻👇🏻🥰🥰
▶️Facebook: Hong Kong Singer Channel
▶️RUclips: hksingerchannel
▶️Website: www.hksingerchannel
▶️Instagram: hkscchannel
#hksingerchannel #hongkongsingerchannel #香港歌手 #hksinger #hksinging #hkscchannel #hki #rubberband #yahoo RubberBand #Yahoo娛樂圈 #讓世界都懂 #berightback