Saidamir Abdukakhkhorov - Munojot (to'plam)

t.me/saidamirthinks
/ saidamir.kh
MUNOJOT
Bugun koshona, nafsimdir g‘olib,
Oshqozon bo‘kdi, ohiri to‘ydim.
Dunyo bo‘g‘zimda namozim qolib,
Robbim, tavbamga kelmay ham qo‘ydim.
Qazo farzimdan uyalish ham yo‘q,
Pullarim bor, go‘yo ko‘ngil ham to‘q.
Tilimdan chiqadi yagona do‘q,
Robbim, zikrimga kelmay ham qo‘ydim.
G‘aflatlarim mo‘l, sakinat armon,
Ruhim charchadi, g‘azabim isyon.
Sog‘indim juma, hutba-yu azon,
Robbim, masjidga kelmay ham qo‘ydim.
Iymon bog‘i tinimsiz urush,
Qalb dengizida quriydi sog‘inch,
Uyqum mo‘l, lekin siyratim notinch,
Robbim, bomdodga turmay ham qo‘ydim.
Bir qush qulasa nelarni sezar,
Qush kabi o‘lim qilaman orzu.
Qancha ko‘p o‘lik ko‘rdi bu ko‘zim,
Robbim, o‘limdan qo‘rqmay ham qo‘ydim.
O‘tkinch hayotim riyoga to‘la,
Sof amal qilish istamas sira.
Mag‘rurlik domida kibr birla,
Robbim, bandani mensimay qo‘ydim.
Bilmadim, amal iborat nedan,
Men bilan bo‘lsang, qo‘rqayin kimdan?
Nomahram zoti tinmay hayotdan,
Robbim, munojot qilmay ham qo‘ydim.
Bir "dunyo" degan matohga o‘rab,
Kimsasiz orolga o‘xshab qoldim.
Senmas, bandangdan mukofot so‘rab,
Robbim, rahmatni unutib qo‘ydim.
Tavbaga tilim yurmaydi sira,
Musiqa ruhim qilmoqda hira.
Allohim, shu on qalbimdan to‘ldim,
Robbim, oldingga kelmay ham qo‘ydim.
Saidamir Abduqahhorov