M. Susanna avouì Y. Buillet- CAN N'AVÌN LÈ-Z-OLE, de Mme LIDIA PHILIPPOT

Can n’avìn lè-z-ole
(poézì de Lidia Philippot, patoué de Verrayes)
T’adon-e-té, mon amì
Sella verda chézón
Can n’avìn lè-z-ole
E savìn po volà…
N’en vu crétre lo gran
N’en vu tsére la foudra
N’en contó lè-z-étèile
Pè pó semblà lon.
N’en matsé dè-z-izeuille
N’en tsavó dè rai-dousse
N’en fé rossegnón
Avoué dè pan è dè gnoué
N’en dzoyé a bara
Outor dou cllotsé…
T’adon-e-té, mon amì
Sella briva chézón
Can lo queur no ècllopoe
Dè radze è d’amour…
N’en rèboudzé lo mondo
E l’en emplì dè sondzo.
N’en vécù d’illujón
D’espouar è dè foué
N’en prèdzé desquettó
Dénonsé contestó.
N’en barsó a la leunna,
N’en crió a tcheu ven
Ma lo ven dè la via
No-z-a tcheu soffló ià…
Ma ioi què t’é mon amì
A sta frèide chèzón
Què lè-z-ombre son londze
E couegné l’orizòn ?
Can passon lè grale
E son-adzon la nèi
Can soffle la bize
E tremblon lè foille
Can veu en campagne
Encontre ou solèi,
Mè de sento ta voué,
Mè de tsertso ta man.
Tornon lè sondzo
L’espouar, l’illujón.
Tro tar, mon amì
Lo queur m’a sètsé
Son tsèite lè-z-ole
E volà pouì pomé.
Reston ou bor dou tsanté
Lè séndre dza frèide
D’én gran foua dè joué…
T’adon-e-té, mon amì
Sella verda chézón
Can n’avìn lè-z-ole
E savìn po volà…