لو مسافر عمرة فالفيديو دا ليك

تعالي اقلك علي شويه معلومات لو انت طالع عمرة قريب تفيدك ان شاءالله عن تجربة 👌
✅️تشتري خط سعودي ولا تشغل خطك المصري تجوال الافضل تشتري خط سعودي من شركة زين باقة الزائر ٣٠ سعرها ٣٥ ريال ودي ارخص سعر هناك فيهم
✅️اشتري مشترك كهربا تحويل من ثلاثي لثنائي لان السعوديه كل الفيش ثلاثي
✅️فعل كريدت البنك بتاعك قبل السفر علشان يفتحلك حدود المشتريات والسحب خارج مصر وبرفعك في الكومنتات صورة لبنك مصر والاهلي تعرف حدود سحب بتاعك حسب نوع الكارت
✅️تقدر لو ليك حساب ف اي بنك منهم تروح تسحب الف ريال ع جواز السفر وتكت الطيران ذهاب وعوده بس قبل الرحله ب ٤٨ ساعة
✅️ حمل تطبيق نسك واحجز الصلاه في الروضه الشريفه
✅️ السلام علي رسول الله صلى الله عليه وسلم من باب السلام في المنطقة الجنوبيه ومفتوح بعد كل صلاه
✅️ حمل تطبيق HHR TRAIN لحجز قطار الحرمين للسفر من مكة للمدينة والعكس
✅️لما توصل مكه حمل تطبيق مرسول او هانجر ستيشن وال ٢ لو انت اول مرة تسجل فيهم هيكون ليك توصيل مجانا وتقدر تطلب من المطاعم بدون رسوم توصيل
✅️ يوجد وضوء داخل الحرم اثناء الطواف مكانه امام الحجر الأسود
✅️ الكعبه لها اربع اركان ٢ منهم بدون اي نقش وواحد منهم منقوش خط مستقيم دا الركن اليماني والآخر منقوش دواير دا الحجر الأسود وبينهم بتقول اثناء الطواف
ربنا آتنا في الدنيا حسنة وفي الآخرة حسنة وقنا عذاب النار
✅️متحسبش بالمصري متحسبش بالمصري الجنيه جنيه بلده 😅 فاتعامل عشان تستمتع
✅️التنقل من المدينة لمكة افضل حاجه بس غاليه شويه هي قطار الحرمين الشريفين ممتاز وسريع بيوصل في خلال ساعتين و ١٠ دقايق وسرعته ٣٠٠ كم / ساعة
عكس الاتوبيس بياخدها ف ٥ ساعات ويفضل تحجز تكت بدري سعره بيكون ١٧٠ ريال للفرد والطفل تحت سنتين خصم ٩٠% وفوق سنتين خصم ٥٠% والشنطة لها ابعاد معينة برفعلك صورتها
✅️لو انت نازل علي مطار جدة الجديد هناك افراد تبع نسك وريله تأشيرة العمرة وتكون محرم هيوفرلك تنقل مجانا من المطار او هناك موقف حافلات جوة المطار ب ٢٥ ريال الفرد يوصلك لمحطة مكة جرول وحاجه ممتازه ومواعيد مظبوطة وطريق ساعه وربع ورخيصه مقارنة بالتاكسي والقطر برضو
✅️السكن حاليا في المواسم صعب تحصل في المنطقة المركزيه في المدينة المنورة ممكن تقعد ف اماكن ابعد شويه بس ع طريق بحيث تاخد تاكسي ب ١٠ ريال للحرم وهيكون اوفرلك
✅️متحسبش بالمصري متحسبش بالمصري الجنيه جنيه بلده 😅 فاتعامل عشان تستمتع
✅️السكن في مكة افضل شارعين ابراهيم الخليل واجياد
ابراهيم الخليل طريق مستوي بس للاسف ف الزحمه دي بيقفلوا دخلة الحرم وبتلف مسافة عكس شارع اجياد فيه مطلع بس انت مبتحسش بيه لان كل فنادق ليه اتوبيسات هناك وموقف بتاعهم قدام مكارم اجياد وخلف برج الصفوة ودا أقرب موقف اتوبيسات دقايق بتكون قدام باب الملك عبد العزيز بس هو حاليا مغلق للصيانه بس في ابواب تانيه جنبه تدخلك علي الكعبه زي ٨٩ و ٧٩ باب الملك فهد ودا بتشوف منه الكعبه المشرفة اول ما تدخل منه🕋❤️
✅️ ممكن تسكن في العزيزية الفنادق هناك مستوي اعلي ومنطقه خدمية اكتر بس اتوبيسات بتنزل جهة المروة موقف غزة فبتمشي شويه حلوين لو عايز تصلي وتشوف الكعبه عكس الدخول من جهة ابراج الساعه
✅️الاكل أذواق مقدرش ارشح فيها حاجه انت ممكن تعتمد ع تقيم مطاعم علي تطبيق مرسول
✅️لو اول مرة تعمل عمرة ادخل ع اليوتيوب واكتب صفة للعمرة وهتشرحلك ازاي تعمل العمرة بطريقه صحيحه
✅️متحسبش بالمصري متحسبش بالمصري الجنيه جنيه بلده 😅 فاتعامل عشان تستمتع
✅️لو هتشتري من مكه هدايا يبقي من سوق الكعكية للخردوات وسوق العتيبية للعبايات تقدر تفاصل هناك عن المحلات الي قدام الحرم
✅️ ونت راجع بسلامه من مطار جدة بتأشيرة العمرة تقدر تاخد كرتونه فيها ماء زمزم من المطار قبل وزن الشنط وبتتشحن ع الطيارة
✅️تقدر تاخد معاك تمر والبيك عادي ونت طالع الطيارة مبيتكلموش عليه بس تركز في وزن الشنطه لان مطار جدة مشدد في القصه دي
✅️متنساش تزور مسجد قباء في المدينة المنورة وتصلي ركعتين والأجواء هناك جميلة جدا وأجر الصلاه هناك كعمرة انزل متوضي من الفندق ونت رايح
✅️هات كرسي ب ٢٥ ريال وسيبه صدقة جاريه في الحرم
✅️ هات معاك علاج البرد كامل ولو معاك طفل هات علاجه كامل وخافض الحرارة بتاعه لان ف انواع مش موجودة هنا واسعار العلاج غاليه جدا للاسف
✅️ في جروب علي الفيس اسمع توعية الحاج والمعتمر تقدر تبحث فيه عن اي سؤال وهتلاقي اجابه ان شاءالله
ربنا يرزقكم ويرزقنا زيارة بيته العتيق مرارا وتكرارا
واخيرا لا تنسونا من صالح الدعاء 🌼

[@aqeel93-ho6gz]

الله يكرمك بشمهندس مصطفى ويكتبها لنا قريب

[@dontreadmyprofilepicture6346]

جزاك الله خير