قصيدة مهداه إلى : فهد علي العازمي

الشاعر : عبدالرحمن سريع العازمي العتيبي
قصيده شكر وتقدير واحترام مهداه الى الاخ الكريم فهد بن علي بن وصل الله العازمي.
من ابو ضيف الله عبدالرحمن السريع.
سر ياقلم واكتب سلامي لابو سيف**
عداد مانش السحاب ونثر ماه.
لن هل من عال المزون المراديف**
وسيله ضفى بالدار باقصاه وادناه.
وابل الثريا يتبعه وابل الصيف**
ويقوم عشب وعوج الارقاب ترعاه.
سلام مافيها شكوك وتحاريف**
مثل العسل حالي على الذوق محلاه.
ينصى فهد راع الكرم راعي الكيف**
راعي معاميلن على النار مركاه.
فنجالها ماصار مثله ولا شيف**
فنجالها دايم هوا الراس ودواه.
عيد الركيب اللي باهلهن مناكيف**
جت من بعيد الدار يابعد ممشاه.
ياطن بهم روس الحزوم الحناتيف**
يبغون من لاغاب ذكره وطرياه.
فهد رجل معروف ما احتاج تعريف**
يذبح قعودن حر ماهو ولد شاه.
يملا بها صينيتن تبهج الضيف**
يسمع بها اللي غايبن مابعد جاه.
ويبهج صدور اهل الركيب المناحيف**
ركبن تبوج الدار يابعد ممساه.
عد الروا ماهوب عد المغاريف**
هداج تيما يروي اللي ورد ماه.
عليه من حاتم قرار وتواصيف**
حاتم زمانه والله الخالق اعطاه.
وعليه من ربع السيوف المهاديف**
اذياب ابن غانم وابو زيد واحلاه.
وابن الوليد محذف الروس تحذيف**
وعنتر يهد الجمع يوم الملاقاه.
وعليه حسن الخلق رجل المواقيف**
والدين عند مهد الاصعاب مقواه.
حرن مطاليعه بروس المشاريف**
روس الجبال العاليه دوم مبداه.
اوجزت ماقلته بكل التواصيف**
من ماعرفنا عنه حنا وصفناه.
شرحن يكفي عن كثير السواليف**
ولو جيت ابشرح مالحقنا مزاياه.
واخر كلامي ياسلامي يا ابو سيف**
ياذيب يا ابن الذيب والنمر حلياه.
مع تحيات:
ابو ضيف الله السريع.

[@user-ko7bg2ej1s]

فهد بن علي صل