Аавдаа ❤️- МУСГЗ, Цагдаагийн хурандаа Л.Гаваасүрэн 👮‍♂️✍️

Өнөөдөр Монгол улсад орчин цагийн Цагдаагийн байгууллага үүсэж хөгжсөний 101 жилийн ой, Дотоодын цэрэг үүсэж хөгжсөний 100 жилийн ой, “Цагдаа, дотоодын цэргийн алба хаагчдын баярын өдөр” тохиож байна.
Миний аав цагдаагийн хурандаа Лэгдэнсүрэнгийн Гаваасүрэн 1973 оноос эхлэн Улаанбаатар хотын Цагдан Сэргийлэх Газрын Эргүүлийн ротод цагдаагаар томилогдсоноос хойш 2020 оныг дуустал 47 жил тасралтгүй цагдаагийн албандаа хоёргүй сэтгэлээр хүчин зүтгэж, амьдралынхаа сүүлийн мөч хүртэл цагдаагийн алба тэр дундаа “Сүлд” чуулгынхаа үйл хэрэгт санаа зовниж, хөдөлмөрлөж байсан.
Гэр бүл, үр хүүхэд шиг ээ л уран бүтээлчид, алба хаагчидаа хайрлан, зөв явахад нь дэмнэж, буруу явахад зэмлэж явсан.
Олонтаа татан буулгагдаж үгүй болох гэж байсан чуулгыг чуулгын дайтай чуулга болгон босгож, чадварлаг залуу уран бүтээлчдээр сэлгэж, шинэ уран бүтээлүүдийг бодлогоор бүтээн туурьваж, урын санг нь баяжуулж явсаныг түмэн мэдэж, түүх гэрчилнэ ээ.
Авьяас билэг, ур чадвар, хүсэл тэмүүллээр дүүрэн сургуулиа ч төгсөөгүй байсан залуусыг урамшуулан дэмжиж, ажил амьдралтай нь залгуулж, уран бүтээлч болох гарааг нь эхлүүлж бүр цаашлаад дэлхийн хэмжээний уралдаан тэмцээнд ч зориулалт хөрөнгө гарган бэлтгэн төрийн дээд өндөр цол шагналд хүртэл өөрийн биеэр тодорхойлолтыг нь бичиж гүйж явдаг тийм л хүн чанартай хүний төлөө бүхнээ зориулдаг хүн байсан.
Цагдан сэргийлэхийн клубээс хэн бүхний сайн мэдэх чадварлаг залуу уран бүтээлчидтэй “Сүлд” чуулга болсонд аавын маань хөлс хөдөлмөр, гавьяа багагүй орсон гэж боддог.
100жилийн ойгоо нэр төртэй хийх гэж хичнээн шөнө нойргүй хонож, өөрийн бие махбодь, эрүүл мэндээ хойш тавин суусаныг ч мэдэх нэг нь мэдэх биз ээ.
Цагдаа, дотоодын цэрэг болон алба нэгжүүдэд нь тусгайлан зориулсан уран бүтээл туурьваж, тэдгээрийн үйл хэрэг, хичээл зүтгэлийг түмэн олонд дуу уран бүтээлээр таниулан түгээж, мөнхжүүлэн үлдээх ажилд хамгийн үнэтэй хувь нэмэр оруулсан уран бүтээлчид бол яах аргагүй МУСГЗ цагдаагийн хурандаа, яруу найрагч Л.Гаваасүрэн, МУУГЗ хөгжмийн зохиолч Д.Цэцэрлэг гэдгийг хаана ч бардам хэлнэ ээ би….
Баяр наадам, ялангуяа бүхий л амьдралаа зориулсан цагдаагийн албаных нь баярт өдөр яалт ч үгүй л аавыгаа санан дурсаж, үгүйлж, сэтгэл хоосорч, хичнээн жил хүсэн хүлээж, хамаг бүхнээ зориулан бэлтгэсэн түүхт 100 жил ээ үзсэн бол л гэж халаглаж харамсаж сууна даа 😔
20-оод жилийн өмнө хар багын найз аа цаг бусаар алдаж, түүндээ зориулан бичиж байсан “Зүүдэнд уяатай аав” дууг өдгөө үр хүүхдүүд бид нар нь аавыгаа бодон, дурсан санаж, сонсон суух тавилантай байж дээ.
Хүн хэн байсан аа мартаж болдоггүй гэж аав маань их хэлдэгсэн.
Хэдий хүний бие махбодь энэ хорвоод үгүй болсон ч хийж бүтээж байсан үйл хэрэг, үлдээсэн ажлууд, бүтээсэн бүтээлүүд нь аавыг минь мөнхөд оршоож, түмэнд дурсан сануулж алдаршуулж явах болно оо.
Тэнгэрт байгаа аавдаа, цагдаагийн албанд зүтгэдэг ах нартаа болон нийт алба хаагчиддаа Орчин цагийн Цагдаагийн байгууллага үүсэж хөгжсөний 101 жилийн ой, Дотоодын цэрэг үүсэж хөгжсөний түүхт 100 жилийн ойн мэнд дэвшүүлж, чин сэтгэлийн гүнээс халуун баяр хүргэж байна. 👮‍♂️👮‍♂️🎉🎉