'O Mare, la poesia di Eduardo De Filippo recitata dal figlio Luca con la musica di Pino Daniele

«’O mare fa paura».
Accussì dice ‘a ggente
guardanno ‘o mare calmo,
calmo cumme ‘na tavula.
E dice ‘o stesso pure
dint’ ‘e gghiurnate ‘e vierno
quanno ‘o mare
s’aizza,
e l’onne saglieno
primm’ a palazz’ ‘e casa
e po’ a muntagne.
Vergine santa…
scanza ‘e figlie ‘e mamma!
Certo,
pe’ chi se trova
cu ‘nu mare ‘ntempesta
e perde ‘a vita,
fa pena.
E ssongo ‘o primmo
a penza’ ‘ncapo a me:
«Che brutta morte ha fatto
‘stu pover’ommo,
e che mumento triste ch’ha passato».
Ma nun è muorto acciso.
È muorto a mmare.
‘O mare nun accide.
‘O mare è mmare,
e nun ‘o sape ca te fa paura.
Io quanno ‘o sento…
specialmente ‘e notte
quanno vatte ‘a scugliera
e caccia ‘e mmane…
migliara ‘e mane
e braccia
e ggamme
e spalle…
arraggiuso cumm’è
nun se ne mporta
ca ce straccia ‘a scugliera
e vveco ca s’ ‘e ttira
e se schiaffea
e caparbio,
‘mperruso,
cucciuto,
‘e ccaccia n’ata vota
e s’aiuta c’ ‘a capa
‘e spalle
‘e bracce
ch’ ‘e piede
e cu ‘e ddenocchie
e ride
e chiagne
pecché vulesse ‘o spazio pe’ sfuca’…
Io quanno ‘o sento,
specialmente ‘e notte,
cumme stevo dicenno,
nun è ca dico:
«’0 mare fa paura»,
ma dico:
«’0 mare sta facenno ‘o mare».
-------------------------
Scopri tutte le nostre storie su www.storienapoli.it!