Buxoro tumanida “Veteran” jangchi-faxriylar sharaflandi

Buxoro tumani hokimligi tashabbusi bilan bugun, 19-fevral kuni “Arsenal” bazmgohida O‘zbekiston "VETERAN" jangchi-faxriy va nogironlari Birlashmasi tashkil etilganligining 28 yilligi hamda jangchi faxriylarni Afg‘onistondan olib chiqilganligining 33 yilligi munosabati bilan tadbir tashkil etildi.
Tadbirda tuman hokimi o‘rinbosari Sobir Hamroyev, “Veteran” jangchi faxriy va nogironlar birlashmasi viloyat bo‘limi rahbari Feruz Eshonqulov, Afg‘oniston tuprog‘ini terroristik guruhlardan tozalashda ishtirok etgan jangchi-faxriylar, jamoatchilik vakillari ishtirok etishdi.
Tadbirda bir guruh Afg‘on urushi faxriylariga tuman hokimligining esdalik sovg‘alari, O‘zbekiston “Veteran” jangchi-faxriy va nogironlari birlashmasi tomonidan ko‘krak nishonlari topshirildi.
Turli jabhalarda ish olib borayotgan bu faxriylar tuman hokimligi tomonidan tashkil etilgan uchrashuvdan behad minnatdor bo‘lishdi. Ular bir tumanda istiqomat qilishayotgan bo‘lishsa-da, anchadan buyon bir-birlari bilan uchrasha olmagan edilar. Bugun ular diydorlashishdi. Birga Afg‘oniston Respublikasi hududida xizmat qilgan chog‘larini eslashdi. Janglarda o‘z xizmat vazifalarini mardlarcha ado etishgan, marhum quroldosh do‘stlarini xotirlashdi.
Qo‘shni Afg‘oniston hududida tinchlikni ta’minlash maqsadida bundan 43 yil avval, 1979 yil 25 dekabrda boshlangan harbiy harakat, 1989 yil 15 fevral kuni Hayraton ko‘prigi orqali qo‘shinlarimizning olib chiqib ketilishi bilan yakun topgandi. Yaqin o‘n yil davom etgan harbiy harakatlar chog‘ida bizning respublikamizdan Afg‘onistonga 65 ming nafarga yaqin kishi chaqirilgan, jangchilarning 1520 nafari halok bo‘lgan, 2,5 mingga yaqini og‘ir tan jarohatlarini olganlar.
Buxoro tumani hokimligi axborot xizmati