Sadi Sadiýew - Eje meni üwresene

EJE, MENI ÜWRESENE...
Eje, meni üwresene,
Şol köneje sallançakda.
Aýnajak bäbejik bolup,
Sallançakdan sallanjakda.
“Göwün sygsa, sygar göwre”
Diýerdiň sen şuny öwre,
Sesiň goşup täze döwre,
Eje, meni üwresene.
Durşy bilen gaýgy-gussa,
Ömür sallançaksyz, eje.
Ezýet berýär desse-desse,
Aýtsam çensiz-çaksyz, eje.
Eje, meni üwresene,
Gowşatma, sallançak bagyn.
Sallançakdan çykyp gidip,
Bilýäňmi men gördüm, nä gün?!
Eje, meni üwresene,
Galdyr sallançagyň badyn.
Hüwdileriň owazyna,
Eresin ýürekde dadym.
Çagasyň sen heniz diýip,
Balaň bilen hezil diýip,
Eziz balam Eziz diýip,
Eje, meni üwresene.
Eje, meni üwresene,
Golaý barmy senden eýse.
Allam seni baky goýsun,
Balaň oňmaz sensiz ýogsa.
Kän gezdiň, agyr ýük daşap,
Balalarym diýip ýaşap.
Bagt diläp maňlaýdan ogşap,
Eje, meni üwresene.
Eje, meni üwresene,
Gurban mährem ojagyňa,
Däli dünýä sygmasamam,
Sygaryn sallançagyňa...
Sädi Sädiýew