السمفونية الخامسة لبيتهوڤن || أحمد عيسى || ضربات القدر

ضربتين في الراس بتوجع
فما بالك ب اربع ضربات ...
كتلة إحباط بتأثر ،، بتؤثر ،، فيك
وانت المتعود عالإحباط ...
الحزن بيكسر فيك دايما
وتقوم وتكمل في طريقك ...
بتسافر لبلاد وبتحكي
عن كل همومك لصديقك ...
وصديقك يسمع أسرارك
ويساعدك جدا في قرارك...
إصرارك في الحب يخلي
العالم يسأل عن دينكم ...
كل الهمزات الموصولة
كات أضعف م الوصل مابينكم ..
كان بينكم حاجة بتربطكم
وبتحلف ماتفرق بينكم ...
كان بينكم حالة ماهش قادرة
إنها تتخطاكو لغيركم ...
يابلاد وصديق أحلى مافينا
إننا وحدينا بنتبرأ ...
من كل اللي بيجرح فينا
وبنقدر نقوى ونتجرأ ...
ونفوز على أوغد أعادينا ....
مزيكا حزينة بتندهلك
فتقوم تكتشف ان بلادك
من وحي خيالك مش أكتر ...
ولأن صديقك كان قلمك
بتلاقي كلامك متسطر ...
تعرف لو تقدر تتشطر
على فقر وخوف بيصارع فيك ....
عالقدر الواقف مستنيك ...
على وحدة بتقتل دايما فيك ...
عالحزن الساكن جوه عنيك ...
تعرف معاليك ...
قدرك كان واقف مستنيك
من قدرك قولي اذاي هتزوغ ...
زوغت كتير ؟
طاب ها وبعدين ؟
قدرك دا مصير
حتماً هتواجهه وهيصيبك ...
اذاي بتحاول تتهرب
كل اما هتبعد هيقرب
قدرك من حظك ونصيبك ...
ونصيبك
صاحب وحبيب
في الشدة اختار انه يسيبك ...
وطبيبك أصبح مزيكا
بتداوي جراح العقاقير
صعب انها تقدر تداويها ....
واتاريها الدنيا بتختبرك
وبتكشف ليك عن معانيها ...
كل ما تستحمل أوجاعها
هتلاقي ضروسها بقت أقوى ...
وكل ماهتحارب شدايدها
هتشد عليك بخيوط أقوى
من شدة اتخلقت قبليها ...
بلاويها بقت حاجة عادية
والعادي بإنك في حسابها ...
حاول تجاريها وتكسبها
لكن لو فتحت يوم بابها ...
إياك تدخل وتسك الباب
قبل المفتاح مايكون في إديك ...
ركز في عنيها وفلترها
وافهمها ان بصت في عنيك ...
إياك تتغر ان شاورتلك
أو ضحكت ليك ...
إياك تتغر بألوانها
دي الناس مخدوعة في عنوانها
والحق عليك ...
الحق عليك
انت الغلطان ...
عايش مع ناس مش فاهمينك
وبييجوا عليك ...
بيقولوا عليك
إن انت كئيب ..
وان انت غريب
وان الترتيب
أفضل م الزحمة ومن الكراكيب ...
وان انت مريب
ويجوز مجنون ....
وانك مسجون
جوه خيالك ....
وانك على قد ما متأخر
على قد ما سابق في مجالك ...
وانك مع حالك وفي حالك
وبإنك مش شاغل بالك ...
انت اللي بتسمع وبتسكت
مع ذلك قلبك أوحالك
ان انت خيالك لو سجن
فدا أكتر سجن تعيش فيه حر ....
المر كتير
بيكون أحلالك م الفاكهة ...
والضُر دا لفظ
وتطبيقه
محفور جوايا بحذافيره ...
معناه وحروفه وتعبيره
أسلوبه وشرحه وتفسيره ...
ترجمته ونقده وتغييره
من ضلمة لنور ...
كان لازم يحصل بإديا
وكان لازم اثور ...
واتمرد
واعلن مملكتي ...
واخرج للعالم كله واقول
إني الملك ..
لينك الفيديو عالفيسبوك
.m.facebook.com...