БЕМОР_НАШАВ_МОДАР!

ФАРЗОНА: #БЕМОР_НАШАВ_МОДАР!
(Бо ово ва чеҳра)
Бемор нашав модар, бемор нашав модар.
Нагзор маро, нагзар бемор нашав модар.
Бардор сар аз болин, аз қулла шуо барчин,
Хуршеди фурўзонфар, бемор нашав модар.
Бар шодии қоқуҳо, бар ҳурмати ҳулбӯҳо,
Бар хотири нилуфар, бемор нашав модар.
Аз синаи чоки ман бемор шавӣ, афтад,
Ёқут ба хокистар бемор нашав модар.
Бар қавм кунам пархош, бо хеш кунам пайкор,
Мебош маро довар, бемор нашав модар.
Эй субҳи тулуи дил, дар зулмати обу гил,
Бахшо ба ҷаҳон ҷавҳар, бемор нашав модар.
Эй нусрати раббонӣ, эй қуллаи инсонӣ,
В-аз ин ҳама болотар, бемор нашав модар.
Эй Марями беисӣ, моем ҳама осӣ,
Поло ҳамаро аз сар, бемор нашав модар.
Бар ҷомеаи бемор, бар миллати бетўмор,
Фатвои наҷот овар, бемор нашав модар!
ФАРЗОНА,
Шоири мардумии Тоҷикистон
Рӯзи Модар ҳумоюн бод!
Дар хониши Бузургмехр Баходур, Лола Ризоӣ ва Шодмон пури Абдураҳим, кормандони рӯзномаи "Ҷумҳурият"
#ҷумҳурият #модар #бузургмеҳр #buzurgmehr