小王子EP2 The Little Prince EP2

2-1
我一直攏家己一个人過生活，無半个講話會投機的朋友。六年前，我駛的飛行機經過撒哈拉沙漠(Suah-ha-la sua-bo̍k)的時，引擎(ia̋n-jín)燒去，姑不而將佇沙漠中降落(kàng-lo̍h)。彼个時陣攏沒機械師傅(ki-kāi sai-hū)抑是(ia̍h-sī)其他的人，我干焦(kan-na)會用得家己一个人想辦法修理。我所紮(tsah)的白茶干焦有夠我一个人喝一禮拜，會生會死猶無的確。
2-2
頭一暝(mî)，睡佇沙漠內，我感覺家己比佇海上發生意外，坐救生船綴水流的水手(tsuí-siú)猶閣較孤單。那按呢，你敢會當體會著，天欲光的時，我聽著有人輕聲細說佇咧共我講話，我有偌仔爾(guā-á-nī)著驚？
我聽著有人佇咧講：
「你敢會用得畫一隻羊仔予我？」
2-3
「啥？」
「畫一隻羊仔予我！」
我掣一趒，躘(liòng)起來四界相(siòng)，為著欲看乎詳細，我出力目睭 nih閣 nih ；我看著一个小小的人，伊用一種誠嚴肅的眼神佇咧看我。
2-4
對沙漠倒轉來了後，我捌畫過伊幾若(kuí-lō)擺，猶毋過我畫的圖攏無伊本人遐爾仔(hiah-nī-á)迷人。話講倒轉來，這嘛袂用得怪我，自從我六歲彼一年，大人打敗我可能的偉大畫家人生了後，除了看會著和看袂著腹內的大錦蛇以外，我就毋捌閣畫過其他的物件(mi̍h-kiānn)矣！
2-5
這馬(tsit-má)，我目睭擘金(peh-kim)佇咧相這个雄雄(hiông-hiông)出現的小人影，驚奇甲目睭強欲落落來。我這陣是佇咧離開人煙(jîn-ian)千外里遠的沙漠內底。閣再講，這个小小的小人影，看起來無成(sîng)是佇沙漠內揣無路，嘛看袂出來伊會因為忝(thiám)、腹肚枵和喙乾煞(suah)腳酸手軟抑是驚惶的模樣。伊真正一點仔攏無成是佇沙漠內底揣無路的囡仔。佇咧這个差(tsha)人煙千外里遠的沙漠。
2-6
當我回神了後，開喙問伊講：
「猶毋過，你若會佇遮矣？」
伊慢慢仔、沓沓仔(ta̍uh-ta̍uh-á)一字一字，敢若(kánn-ná)佇咧講一件誠重要的代誌。伊講：
「敢會用得，畫一隻羊仔予我？」
這款按怎想都想無的代誌傷過激烈(kik-lia̍t)又閣誠僫(oh)抵抗的時，是無人有法度講無愛的。
2-7
就算講，我真正感覺譀譀(hàm-hàm)-佇咧離開人煙千外里遠又閣有失去性命的可能的這當陣，欲愛我畫一隻羊仔-猶毋過，我猶是對橐袋仔 (lak-tē-á) 內提一張紙和鋼筆，準備欲畫一隻羊仔。
猶毋過，佇咧這个時陣，我煞想著：
「這世人，我干焦學過地理、歷史、數學和文學遮的科目。」
2-8
所以，我有淡薄仔(tām-po̍h-á)毋甘願共小王子講：
「我袂曉(bē-hiáu)畫圖。」
伊應講：
「無要緊矣！畫一隻羊仔予我……。」
我規世人毋捌畫過羊仔，所以我就畫一張以前定定畫的錦蛇，是看袂著錦蛇腹肚內情形的彼一張。當我聽著小王子看著這張圖了後講的話，我有影掣一趒。
2-9
「無愛啦！我是欲愛一隻羊仔，毋是欲愛一隻佇大錦蛇腹肚內的象。大錦蛇傷危險，象又閣傷大隻，我蹛的所地，每一項物件攏小小仔爾，我欲愛一隻綿羊(mî-iûnn)，畫一隻綿羊予我。」
既然按呢！這擺我就畫一隻羊仔。伊斟酌看了後講：
「袂使啦！這隻羊仔看起來破病(phuà-pīnn)甲足嚴重的，閣重畫一張。」
2-10
我又閣畫一張。
小王子溫柔(un-jiû)又閣寬容(khuan-iông)笑微微講：
「你家己看，這毋是綿羊，這是羊犅(iûnn-káng)，伊的頭殼頂閣有發角(huat-kak)。」
因為按呢，我又閣重畫一張。
2-11
猶毋過，就親像進前彼兩張圖仝款，這張圖猶是無著伊欲愛的坎站(khám-tsām)。伊講：
「這隻傷老矣，我想欲愛一隻會用得活誠久的綿羊。」
這個時陣，我的耐性強欲盡磅(tsīn-pōng)矣，因為我家己趕緊欲開始拆飛行機的引擎。所以，我二三下手畫好一跤囥(khǹg)羊仔的箱仔，共伊講：
「這是囥羊仔的箱仔，你欲愛的羊仔佇箱仔內底。」
2-12
想袂到，這位鑑賞家笑咍咍(tshiò-hai-hai)講：
「就是這！這就是我欲愛的羊仔，伊敢會食足濟草矣？我蹛的所在，逐項物件攏小小仔爾……。」
我應講：
「遐的草仔絕對有夠通予伊食，我畫予你的羊仔嘛是小小仔爾。」
2-13
伊共頭向(ànn)落去斟酌看：
「哇～真正足細隻呢。你看，伊咧睏呢……。」
這就是我和小王子頭一擺見面的過程。
#台語 #audiobook #taiwan