Då Daniel drog

Øyvind Johnsen i Brandasund har samla mange gamle ting opp gjennom åra. I videoen fortel han om kor leddiken var i plassert i kistene.
Ordforklaringar:
Leddiken var eit lite rom i kista. Den hadde lok og var festa øverst på ei av kortsidene. Der kunne ein legga mindre gjenstandar og verdisaker t.d. bunadsølv.
Dyffeltrøya = trøye av valka ullstoff = vadmelstrøye. Det er ullstoff som er hardt etterbehandla med stamping og toving i såpevatn eller andre kjemikaliar.
snl.no/vadmel
Kvitlepar = to ulltepper av to like vevar som er sydd saman på midten .
Skilderi = teikna eller malt bilde.
Då Daniel drog -
Jakob Sande
Vesle Daniel skal ut i verda
og gjer kista klar i denne stund.
Over store hav mot sør går ferda
med "San Salvador" av Haugesund.
Der kjem far hans, gamle Dave Myra,
med ein låspung, messinggul og blank,
og slær fast at her ligg månadshyra
like trygt og stødt som i ein bank.
Men på kne ved leddiken ligg mor hans
og legg plagg for plagg i kista ned,
medan Knute-Sivert, yngste bror hans,
står og tryglar om å få bli med.
Mjukt og varleg stryk ho dyffelstrøya
som skal pryde Daniel i land,
og eit dobbelt kvitlepar for køya
legg ho ned med kjærleg moderhand.
Under loket ruvar reisenista
- reine julekosten er det plent,
og på heidersplassen øvst i kista
lyser salmebok og testament.
Men frå leddiken i løynd det glimtar
i eit lite flekkut skilderi,
der med blomstret barneskrift ein skimtar:
"Di til døden trufaste Mari".
Har din glade lått med gråt seg blanda?
No er timen komen, Daniel!
Havet kallar på deg, kom med handa,
vesle Daniel, farvel, farvel!
Jakob Sande