Стихеры Святой Пасхи | Пасхальные Песнопения | Да воскреснет Бог, и разыдутся врази его.

Да воскре́снет Бог,/ и разыдутся врази́ Его́.
Па́сха/ свяще́нная нам днесь показа́ся;/ Па́сха но́ва свята́я;/ Па́сха та́инственная;/ Па́сха всечестна́я./ Па́сха Христа Изба́вителя;/ Па́сха непоро́чная;/ Па́сха вели́кая;/ Па́сха ве́рных./ Па́сха две́ри ра́йския нам отверза́ющая.// Па́сха всех освяща́ющая ве́рных.
Я́ко исчеза́ет дым,/ да исче́знут.
Прииди́те/ от виде́ния жены́ благове́стницы,/ и Сио́ну рцы́те:/ приими́ от нас ра́дость благове́щения, Воскресе́ния Христо́ва:/ красу́йся и лику́й/ и ра́дуися, Иерусали́ме,/ Царя́ Христа́ узре́в из гро́ба,// я́ко жениха́ исходя́ща.
Та́ко да поги́бнут гре́шницы от Лица́ Бо́жия,/ а пра́ведницы да возвеселя́тся.
Мироно́сицы жены́,/ зело рано,/ предста́ша гро́бу Живода́вца,/ и обрето́ша А́нгела/ на ка́мени сидя́ща,/ и той провеща́в им,/ си́це глаго́лаше:/ что и́щите Жива́го с ме́ртвыми?/ что пла́чете Нетле́ннаго во тли?// Ше́дше, пропове́дите ученико́м Его́.
Сей день, иже сотвори́ Госпо́дь,/ возра́дуемся и возвесели́мся в онь.
Па́сха кра́сная,/ Па́сха, Госпо́дня Па́сха!/ Па́сха всечестна́я/ нам возсия́. Па́сха,/ ра́достию друг дру́га приимем./ О Па́сха!/ Избавле́ние ско́рби,/ и́бо из гро́ба днесь,/ я́ко от черто́га/ возсия́в Христо́с,/ жены́ ра́дости испо́лни, глаго́ля:// пропове́дите апо́столом.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Воскресе́ния день,/ просвети́мся торжество́м,/ и друг дру́га приимем./ и рцем бра́тие,/ и ненави́дящим нас,/ прости́м вся Воскресе́нием,/ и та́ко возопием:/ Христо́с воскре́се из ме́ртвых,/ сме́ртию смерть попра́в,// и су́щим во гробе́х живо́т даровав.