Christmas Na Hman Thiamnak Ding Ah - Pst. Ord. Hoi Cung Tum

Christmas hi Jesuh Cross ah a thih i a thawh hnu, Khrihfa bu a dir hnu kum 300 chung hi an rak tuah ballo. Mah te hmanh nih cun Christmas kan hmanning kongah fiannak a kan pek cang.
Christmas hi hman ding a si ko, mifim hna hmanh nih pei laksawng an pek i, an biak cu. Cun Prophet hna hmanh nih pei a chuahnak kong an rak chim chung i, hmuh lai hmanh an rak i ngaih cu tiah a timi tampi an um. Cucaah a hramthawk ah Roman Catholic lawng nih an tuahmi a si ko zongah tuah hi a ttha ko a timi an tampi ve. Cu ning cun vawleicung pumpi nih hman a si beh. Tuah lonak ding in bia alnak kha an duh lo i, an doh ve.
Christmas hi Jesuh Cross in a thih i, a thawh hnu in zultu hna zong nih an tuah ballo. Khrihfa bu hmasa hna le zumtu hmasa hna zong nih an tuah ballo. Tuah a kan fialnak zong a um lo. Christmas kan tuah ruangah aa ningcang lomi sualnak tampi tu a karh. Zumlotu tiang nih an tuah i, sullam zeihmanh a ngei lo. Cucaah kan tuah ding a si lo tiah an aupi ve. RC kan chuah tak hnu ah RC ro kan i chuahpi mi a hmaan lonak kong kha tampi an chim i, an doh ve. Tuah le tuah lo kongah tutiang ahcun a tuahmi an tam deuh i, tuah nih a tei lengmang rih caah tuah a si rih ko. A si ahcun zeidah a hmaan deuh kun?
A phi cu 25 December ah Pathian thangtthat le Pathian biak kha a sualnak a um lo. Zei ni paoh ah Pathian biak le thangtthat cu a sual lo. Rawlei zong kha a sualnak a um lo. Amah belte Christmas a si tiin kan tuahmi tu hi aa thawknak a um lo i, a kan fialnak zong a um lo. Khrihfa bu hmasa hna le zumtu hmasa hna nih an rak tuah ballo. Christmas tuahnak in Bawipa Ni (Zarhpi ni) ah Bawipa kan biakmi le kan thangtthatmi tu hi a hmaan bikmi le Khrihfa nih ni sunglawi ni khat te lawng kan ngeihmi a si ti kan theih ahcun December thla kan phak tikah kan khuaruah le kan zumhning zong Christmas kong pehtlai in a hmaan deuh ko lai.
Video credit: GBC, Hakha