НЮАНС хамтлаг 15 жилийн ойн нэвтрүүлэг

“Нюанс” хамтлаг 2001 оны 12 сарын 17 анхлан байгуулагдаж энэ үеэс эхлэн уран бүтээлийн гараагаа эхэлсэн. СУИС-ийг дуурийн дуулаачийн мэргэжлээр дүүргэсэн “Нюанс” хамтлагийн уран бүтээлчид манай монголын дуурийн урлагийн анхдагч гэгддэг Монгол Улсын Ардын жүжигчин, Хөдөлмөрийн баатар Ц.Пүрэвдорж, Монгол Улсын Ардын жүжигчин А.Загдсүрэн, Б.Жамъяанжав, МУГЖ Ц.Түвшинтөгс, Г. Гэрэлбаатар нарын шавь нар юм.
СУИС-ийг төгссөн даруйдаа дуурийн театрт дуучнаар орж ажилласан бөгөөд тэдний гол зорилго нь сонгодог бүтээлийг орчин үеийн хөгжмийн төрлөөр дамжуулан соёлын түвшинд тэр дундаа дуурь болон поп урсгалын дунд шинэ алхамыг хийж үзэгчдэд хүргэх явдал байсан юм.
Гэвч тухайн үед тэдний хийж санаачилж байгаа уран бүтээл, попера гэдэг нэр томъёог хүлээн зөвшөөрөх хүмүүс тун цөөхөн байсан байна. Монголын хөгжмийн ертөнцөд өөрсдийн байр сууриа олохын тулд тэд чамгүй олон уран бүтээлийг хийж байсан.
Хамтлаг байгуулагдсан эхний хэдэн жилд Монголын хөгжмийн зохиолчдын уран бүтээлийг түлхүү дуулж, зарим үед сонгодог уран бүтээлийг тоглолтын дунд хэсэгт оруулж үзэгчдэд хүргэхийг зорьж байсан боловч тухайн цаг үе, үзэгчдийн хөгжмийг ойлгох ойлголт тааруу байсантай холбон тайлбарлах нь зөв байх. Тэд монголын үзэгчдэд уран бүтээлээ хүргэхээс гадна гадаадын улс оронд болсон олон улсын чанартай фестиваль арга хэмжээнд амжилттай оролцож Монголын сонгодог урлаг тэр дундаа попера урсгалыг сурталчлах үйлсэд гар бие оролцож хувь нэмрээ оруулсаар ирсэн байна.
Хэдийгээр сонгодог бүтээлийг янз бүрийн хувилбараар найруулан хийж байсан ч тэр нь олон нийтэд хүртээмжтэй байж чадахгүй, хөгжмийн боловсрол, хүлээн авах цаг хугацааны хувьд ч үзэгчид нь бэлтгэгдээгүй байсантай холбоотой юм. Гэхдээ “Нюанс” хамтлагийн уран бүтээлчид чамгүй их хүч хөдөлмөр, хөрөнгө мөнгө, уран бүтээлийг тасралтгүй хийсний үр дүнд попера гэдэг нэрийг Монголын хөгжмийн нэр томъёонд гаргаж ирсэн хамтлаг гэж үзэж болох юм.
Мөн “Нюанс” хамтлаг урын сан, уран бүтээлдээ дэлхийн сонгодог бүтээл, алдартай поп болон попера дуунуудыг Франц, Итали, Испани, Орос, Англи, Хятад, Герман хэл дээр дуулдагаараа бусад хамтлаг дуучдаас илүү онцлогтой хамтлаг гэж болно.
“Нюанс” хамтлаг дэлхийн сонгодог бүтээлүүд болон гайхамшигтай урсгал болох попераг таниулж 2007 оны 3 сарын 26, 27-нд Олон улсын театрын баярын өдөр анхны “Нюанс попера” тоглолтоо хүргэсэн нь тэдний анхны уран бүтээл байсан юм.
Уг тоглолтоос хойш “Нюанс” хамтлаг нь урын сандаа эх хэл дээрээ болон гадаад хэл дээр дуулсан 100 гаруй дуутай бөгөөд 20 гаруй видео клиптэй юм.
Нюанс хамтлагийн хийсэн тоглолтуудыг жагсаавал:
• 2004 оны 3 сард “Голомт хурайлсан тэнгэрлэг аялгуу”
• 2007 оны 3 сард “NUANS popera”
• 2008 оны 3 сард “ISABEL” popera”
• 2009 оны 3 сард “AMORE” popera”
• 2010 оны 3 сард “ANGELINA” popera”
• 2010 оны 11 сард Монгол орны 21 аймагт
• 2011 оны 3 сард “MELODY” popera”
• 2011 оны 12 сард “NUANS 10 th Aniversary” popera”
• 2012 оны 3 сард “Бид ээждээ хайртай”
• 2015 оны 11 сард “GRANADA” popera
• 2015 оны 6 сарын 04 - с 7 сарын 04 хүртэл Европын Холбооны Улсаар Аялан тоглолт
• 2016 оны 10 сард ОХУлсын Улан-Үдэ хотноо “NUANS 15 th Aniversary” popera
• 2016 оны 11 сард ““NUANS 15th Aniversary” popera concert
2012, 2013, 2014 оны 3 сард ОХУ-ын Эрхүү, Улаан-Үд, Чита хотуудад “Нюанс попера” тоглолтоо амжилттай хүргэж хилийн дагуух хотуудад аялан тоглолтоо хийсэн. Мөн Нюанс хамтлаг нь:
- ОХУ Москва хот “SICSESS” Олон улсын арга хэмжээ /2005 он/
- ОХУ-ын Халимаг Элиста хот 3 сард 14 районд тоглолт /2006 он/
- Францын Нонси хот, Вител, Розерсалин хотуудад “Дэлхийн дуу хоолой” олон улсын найрал дуучдын наадамд /2007 он/
- Олон улсын PTPI урилгаар Тайваны Тайнан хот /2007 он/
- Олон улсын PTPI урилгаар Солонгос улсын Сөүл хот /2007 он/
- ОХУ-ын Москва хот Улаанбаатар хотын өдрүүд /2007 он/
- Испани улсын Зарагоза /2008 он/
- Солонгосын Сөүл хот “HI SEUOL” фестиваль /2009 он/
- ӨМӨЗО Хөх хот дипломат харилцаа тогтсоны 60 жилийн ой /2009 он/
- Солонгосын Сөүл хот “HI SEUOL” фестиваль /2011 он/
- ОХУ Улаан Үдэ хот ОХУ-ын АЖ Ким Базарсадаевын 75 насны ойн тоглолтонд урилгаар /2012 оны 4 сар/
- ОХУ-ын Агинский районд болсон Олон улсын “Алтаргана 2012” урилгаар /2012 оны 8 сар/
- ОХУ-ын БГТРК телевизийн “Круг друзье” хандивийн тоглолтонд /2012 оны 9 сар/
- ОХУ-ын Эрхүү хот, Усть Ордын буряад, Улаан үдэ хот, Чита хот, Забайкалский край, Агинский район /2013 он/ зэрэг олон улсын чанартай арга хэмжээ тоглолтуудад “Нюанс” хамтлаг амжилттай оролцож мөн тоглолтоо зохион байгуулж ирсэн байна.
- ОХУ -ын Улан Үдэ хотын БГТРКомпаний 75 жилийн ойн тоглолт 2016 оны 10 сар
Мөн 2006 онд “НЮАНС” нэртэй анхны цомог, 2008 онд “Nuans” popera цомог, 2010 онд “Amore” popera цомог, “Бид нэг хүсэлтэй” цомогуудыг тус тус гаргаж олны хүртээл болгожээ.

[@mendbayarbayaraa6891]

Урын сандаа сайхан шилдэг дуунууд ихтэй МУНДАГ хамтлаг шүү.. Амжилт хүсье!