ერთი კაცის სოფელი - ენთას მთელი ღამე ნათურა, სოფლიდან შუქი რომ გავიდეს

www.Mtisambebi.ge - „მთელი ღამე სინათლეს ანთებულს ვტოვებ, ისევ მეთქი დაიხარჯას ის ორი თეთრი და ენთას მთელი ღამე ნათურა, რომ სოფლიდან შუქი გავიდეს. არ მინდა, ვინმეს ეგონოს, რომ ნასოფლარია და არვინ ცხოვრობს. დაინახონ, ცოცხლობს ეს სოფელიც“, - ამბობს 76 წლის ვახტანგ ფიცხელაური. ის მარტო ცხოვრობს ყაზბეგის რაიონის სოფელ ქოსელში. ქოსელი, ან მოხეურად ქოსელთა, სნოს თემის სოფელია, ახალციხიდან კარკუჩას გზას ვიდრე დაადგები, მდინარის გაღმა, მთაზეა შეფენილი.