Getməyə nə var ki, mən də gedərəm,
Ürəyin varsa qal,deyim halaldır.
Ən asan şey qəlb qırmaqdır əzizim,
Bir dəfə könül al,deyim halaldır.
Üzülmüş əli tutmaq da çətindir,
Sınıq qəlbi ovutmaq da çətindir.
Düzdür,hərdən unutmaq da çətindir.
Hərdən də yada sal,deyim halaldır.
Gözüm səni bir də görə,görməyə,
Qorxum odur yadlar aman verməyə.
Can atarsa aramıza girməyə,
Vermə ona macal,deyim halaldır.
Hər şeyi məhv etdin xəyanətinlə,
İndi baş-başa qal xəcalətinlə.
Ucalmaq yaxşıdır,ləyaqətinlə
Təmiz adla ucal,deyim halaldır.
Müəllif: Amid Fərəcov