عمر طاهر يقدم | حلاوة الشيخ سيد
HTML-код
- Опубликовано: 12 янв 2024
- حلاوة الشيخ سيد
عارف لما حد يرمي لك كلمة و يترتب عليها مشوار ممكن يغير حاجة فيك اهو ده اللي عمله معايا عمار الشريعي
سنة 97 تقريبا كانت عندي هواية مكلفة شوية
كان الانترنت لسه ماشدش حيله في مصر مافيش يوتيوب ولا منصات اغاني
ف كنت كل ما يبقى معايا قرشين اطلع على فرع من فروع شركة صوت القاهرة
و اشتري شرايط و اعمال المطربين اللي انا عارف انهم اصحاب تجارب كانت مهمة بس الشغل بتاعهم مش متاح بسهولة
و في مرة وقعت في شريط للشيخ سيد النقشبندي
كنت اول مرة اكتشف اغنية مولايا اني ببابك و فاكر كويس اللحظة اللي اتسمرت فيها في فرع صوت القاهرة لما الموظف شغل لي الشريط يسمعني
عشت مع الراجل شوية و قررت اكتب عنه
عايز اكتب عن عظمة اللي ب اسمعه بس عايز اكتب كلام علمي محترم مش عاطفي
طب تكلم مين يفصص معاك العظمة دي؟
مافيش غير الغواص عمار
الو استاذ عمار ازيك طبعا انت اكيد سمعت تجربة الشيخ سيد النقشبنيد كويس
قال لي سمعته؟ انا اشتغلت معاه 3 مرات
مرتين و هو عايش و مرة بعد ما اتوفى
مرة عازف في شغله مع بليغ حمدي
و مرة ف شغله مع الملحن ابراهيم رجب كنت انا الفرقة لوحدي و كنت البطانة كمان
و مرة بعد ما اتوفى جابوا لي شرايط عليها ادعية ليه و قالوا لي جهزها موسيقيا للإذاعة
فعملت لها كوفر موسيقي اللي هو الله الله لا إله إلا الله و طبخت جواه الحاجت اللي كان مسجلها
طب ايه يا استاذ عمار؟
قال لي اعجوبة من اعاجيب الزمن و الإنشاد
قفلات من بتاعت الكبار
كل قفلة جملة تحسسك انه جاب جون يخليك تتنطط مكانك و تقول الله
و ماكنش عنده خبرة بالمقامات الموسيقية بس عمري ما سمعته بينقل غلط
فطرة أكبر و اقوى من المعرفة و الدراسة
و راح قايل لي الراجل ده يستحق الكتابة عنه
ما تروح تدور على عيلته في طنطا
بس كدة
قال الجملة و كت عليا في البيجو اللي رايح طنطا و انا جواه زي المجاذيب رايح ادور على مجهول
.........................................
داخل طنطا و كلي يقين إن الشيخ سيد مش هيتأخر عني
و قد كان
سؤال في التاني قبل التالت كنت قاعد في بيت حفيده الشيخ أحمد
وقتها كان فرحان و مندهش ان الصحافة افتكرت جده أخيرا
حبيت اقول له دي زيارة واحد مجذوب مش صحفي بس مارضيتش احبطه
و على الحيطة صورة ليه كبيرة باصص من بلكونة على مسجد السيد البدوي
سألت عن المكان اللي باصص منه
ضحك الشيخ أحمد و حكى لي عن الرؤية اللي خلت الشيخ سيد يجاور السيد البدوي و يعيش في بيت باصص على المسجد
لحد ما البيت جاله في يوم قرار إزالة بسبب عمره و الضغط اللي عليه
ف ابتدى الشيخ سيد يجري ما بين مكاتب المحافظة لحد ما وفر لكل اسرة من سكان البيت شقة يعزلوا فيها
و خفف الضغط على البيت للدرجة اللي تسمح له يكمل فيه لوحده بأمان
قلت له ده اللي خلاه مايعيش في القاهرة حتى بعد النجاح و النجومية
قال لي كان بيقول مستحيل اسيب مجاورة السيد البدوي
اسأله عن طقوسه مزاجه الطريقة اللي بيتعامل بيها مع موهبته
قال لي بص يالا بينا نروح لبنته و هي اللي تحكي لك .. ودي كانت كرامة تانية
في الطريق كانت بتروح و تيجي في دماغي مشاهد من الحكايات اللي جمعتها عن الشيخ سيد
المنشد اللي الاذاعة اكتشفته بعد ما بقى عنده خمسين سنة و كان جد
من الليلة الكبيرة في مولد السيدة زينب
لمكتب رئيس الإذاعة اللي كانت بتغطي الإحتفال
بعت جابه و كان العرض محدد
دعاء بعد كل اذان مغرب بصوته
أسبوع في التاني كانت الناس بتتكلم عن الصوت العجيب اللي بيظهر كل يوم المغرب
في مقدمة الناس دي كانت الست أم كلثوم شخصيا
بعتت له و اتقابلوا .. محبة اتقلبت صداقة اتقلبت تخطيط لمشروع مشترك بين الست و الشيخ سيد
"رواية تاريخ الرسول غناء"..
بس القدر ما سمحش بتنفيذ الحلم ده
و كانت الست عملت فينا كلنا جميلة لما عرفت الشيخ سيد ب بليغ حمدي
فخرجت الألماظات اللي عارفينها
وفي مقدمتها مولايا اني ببابك اللي كتبها الشاعر الكبير عبد الفتاح مصطفى
في قعدتي مع بنت الشيخ سيد فاكر كويس الابتسامة اللي كانت بتملى وشها كل ما تقول جملة الشيخ سيد
( الشيخ سيد اتشهر برة مصر الأول و بعيدن جابوه يغنى في مولد السيدة زينب و بالصدفة بابا شارو سمعه و أخده الإذاعة )
( الشيخ سيد هو اللى أحيى جنازة أبو الرئيس السادات بعدها السادات جاب ينشد في فرح بنته بعدها قال لهم احبسوا النقشبندى و بليغ مع بعض لحد ما يطلعوا حاجة ..فكانت مولاى إنى ببابك).
المرة الوحيدة اللي غابت ابتسامتها لما قالت
( مافيش حد مهتم بسيرته خالص مش عارفة ليه)
بس في ثواني رجعت لها الابتسامة تاني و هي بتقول (الشيخ سيد أصلا ما كنش عايز حاجة من الدنيا ) .
فكرتني الجملة دي بكلام عمار الشريعي
قال لي كان راجل بسيط مايهموش حاجة غير اللي بيسجله يطلع حلو و كانت كل طقوسه انه معاه مساعد شايل علبة حلاوة طحينية بياخد منها حتة قبل ما يخش يغني علشان تجلي صوته .. و لما نسمعه بينادي على المساعد الحلاوة يا شيخ سيد نعرف انه جاهز
فاكر كويس يومها إني رجعت من طنطا متأثر باللي سمعته و اللي عايشته في ناس من لحم و دم الشيخ سيد
رجعت مشحون بحكاية موهبة أقرب لمعجزة و شخص رعاها وهو زاهد في اللي جي منها
كتبت و نشرت في نص الدنيا بعد شهر من الزيارة كنت ب احاول اجمع فيها جملة مفيدة تعبر عن اللي جواك
وفاكر اني اترددت اكتب مشهد نهاية القصة دي ولا هي قصة مالهاش نهاية
بس لقيت ان مشهد النهاية جزء من الكرامات اللي مالية حكاية الشيخ سيد
فبراير 76
قرأ الشيخ سيد قرآن الجمعة في مسجد التليفزيون
و خرج عدى على أخوه و ساب له ورقة قال له ماتفتحهاش غير وقت اللزوم
رجع بيته و اتوفى
لما فتح اخوه الورقة كان مكتوب فيها
( ساموت غدا ، لا تقيموا مأتما و اكتفوا بنشر النعى ، وأدفنونى في العنوان المذكور)
في العنوان المذكور لقوا مدفن واضح إنه حديث متجهز بلوحة رخامية تحمل اسم الشيخ سيد ، ف سألوا إن كانت قيمة المقبرة قد سددت بالكامل ولا لسه عليها حاجة
فقالوا لهم الشيخ سيد دفع فلوسها كاملة من اسبوع. 
Развлечения
النهارده كنت بدور اسمع له حاجه وكأن صوته بينقلك لرحاب الله ، رمضان مش بيبتدى غير معاه ومع قرآن الشيخ محمد رفعت قبل المغرب والشيخ سيد مكاوى المسحراتى ، رحمه الله عليهم جميعا.
خسرنا قامات لن يجود الزمان بمثلها .
صوت من اروع ما انجبت مصر .
الله ❤
روعة روعة .. نور علي نور علي نور❤❤❤
كنت بحسب ان الفيديو ده ظهر قدامي صدفة. لكن الحقيقة اني النهرده بس قررت اصلي على النبي بنفس طريقة النقشبندي اللي جت في الفيديو. ومكنتش اعرف ان هو اللي بيقولها بالطريقة دي. بعدها بساعات لقيت الفيديو ده!
اللهم صلي وسلم وزد وبارك على سيدنا محمد وعلى آله وصحبه
كده عرفنا صوته كان حلو ليه ..ده متطعم بحلاوة حرفيا❤
اية الجمال و الحلاوة دي 😘😘😘😘😘
الله يرحمه قدم كثيرا لنا وامتعنا جعله الله في ميزان حسناته
أحسنت استاذ عمر بارك الله فيك وكتر من أمثالك ممكن يهتمون بالدرر المصريه ❤
رحمة الله على الشيخ النقشبندي
المبدع عمر طاهر الاستاذ
دمعت و انا باتفرج من كتر ماتخيلت الشيخ سيد الله يرحمه و تخيلت شخصيته .. شكراً ان حلقاتك بتبقى فاكهة اليوم
شكرا يا استاذ عمر بالله عليك اوعى تقف شغلك ولا تفتكر انه مالوش تأثير شكر علي الذوق و المنهج العلمى و الوعي بالقدوة الحسنة شكرا
رحمه الله تعالى ❤
0:12 والله يا أستاذ عمر مش عارفه أشكرك ازاي كل حاجة بنقدمها وبتقولها وتكتبها احلي من الحلاوة ❤❤
اللهم صل على سيدنا محمد وعلى آله وصحبه وسلم💚
الف رحمة ونور على الشيخ سيد صوته كان طالع من قلبه مش حنجرته
الله يفتح عليك ❤ ويرحم الشيخ سيد ❤
الله يرحمه ويسكنه فسيح جناته ويجازيك خير علي هذا البحث وياريت تعمل بحث مماثل عن الشيخ رفعت الله يرحمه
اللهم صل وسلم وبارك على سيدنا محمد وعلى آله عدد كمال الله وكما يليق بكماله
شكرا يا عمر
يا استاذ عمر دموعنا بتنزل واحنا بنسمع فيديوهاتك😢❤
الله علي الجمال والرقي
جمال السرد الذي يجعلك تعيش الصورة كاملة ويأخد المشاعر لمنطقة إيمانية رائعة
شكراً جزيلاً لحضرتك وتمنياتي بالتوفيق
الف رحمة ونور يا شيخ سيد
جميل جدا كلام حضرتك يا اجمل كاتب فى الدنيا حقيقى كل قصصك مبدعه بتحسسنا بلزمن الجميل السيد المقشبندىجميل جاا ربنا ما يحرمناش من حضرتك يامصرى يا اصيل
الله يفتح عليك يا سيدنا .. الأكابر ♥️🙏🏼
حكاية جميلة رحم الله عظماء شيوخنا وجراء الله كل خير عنها والرجا المزيد من الحكايات عن عظماء مصر فنحن فى اشد الحاجة إلى القدوة
ربنا يباركلك استاذنا عمر انتمائي لمصريتي رجع تاني بسببك او معاك
بعد ما فقدها او تناستها او رمتها من دماغي وتفكيري
استمر يا أستاذنا
رائعة
والله انت بتفكرني بعمار الشريعي ربنا يبارك ف عمرك 🤲💖
مبدع مبدع مبدع يا استاذ عمر. تحياتي لشخصك الرائع الطيب
عاوزين حلقة عن نصر الدين طوبار رحمه الله .. تحياني
جميل مش مكفيه ده الجمال كله ربنا يبارك فيك ويحفظك
فيديوهات جميله ليه قافل التنزيل ،النور بيقطع و ببقى عاوزة اسجلها اسمعها وقت قطع النور ،تحياتى
الله يرحمه فعلا كان متميز بالذات مع الحان بليغ
روووعه جزاك الله خيرا بتخلينا نرجع لأيام عمرنا مانقدر ننساها❤
انت جميل
👏👏
رائع يااستاذ عمر
وياريت لو تهتم اكتر بقناه اليوتيوب لأنك بتعرف تحكي والناس بتحب تتونس بالناس الصادقه اللي زيك
💖💖💖
ياجمال الشيخ سيد . الف رحمة ونور
انا اعرفهم كويس الله يرحمه احمد النقشبندي اللي عملت معاه اللقاء و بهاء حفيده التاني ربنا بديله الصحه و الاتنين كان صوتهم رائع
❤
إيه الجمال والعظمة
كرامات يقشعر لها ابدان والله
ايه الجمال والعظمة دية الله يرحمك يا شيخ سيد
دمعت والله احنا عندنا ناس عظام احنا مش عارفين قيمتهم
جزاكم الله كل خير على كل ما تقدمه استاذ عمر
الله ❤❤❤
الله يا أستاذ .. الحلقة قصيرة أوي المرة دي على حلاوة الحدوتة ❤
فين (يعجبني كلك يا ولا .. كلك عاجبني) ❤
هو ازاي الصفحة بتاعت عمر طاهر معلهاش فولورز كده يا جدعان