【星級斜槓族】ViuTV女神沈殷怡棄律師入娛圈 自認變態喜歡考試 曾有一刻後悔入行？！

說到ViuTV女神，相信非沈殷怡（Shirley）莫屬！出道5年，Shirley涉獵戲劇、綜藝、主持、司儀等工作，在各方面均有亮眼表現，因而收獲大量粉絲。名牌大學法律系出身的Shirley，笑言自己喜歡考試，因可從中獲得成功感。不過，Shirley當年毅然放棄高薪厚職的律師，選擇開展演藝人生，她坦言曾因疫情而有一刻後悔，但感恩得到家人的支持；同時她亦積極裝備自己，期望隨時以最好、最真實的自己呈現於觀眾眼前。
Shirley是圈中數一數二的高才生，在DSE考取優異成績後，獲獎學金到上海復旦大學修讀法律系，及後在香港中文大學升讀法學碩士。雖然Shirley的父親是一名律師，但她當初並不打算走同一條路，「其實細個最想做馴獸師或者寵物訓練員，因為我好鍾意動物，屋企人都一樣。我未出世之前，屋企其實已經有養狗；如果我細個喺街邊亂撿嘢返屋企，只要係生命，佢哋都會話『好，我哋養啦！』」因此，Shirley從小被父母薰陶，期望從事動物相關的工作。
不過，中學時Shirley便打消了這個念頭，她表示︰「特別一開始想做獸醫，原來要讀生物學或者其他理科。但因為我由細到大都好明確知道自己係一個文科人，所以當時嘅選修科目全部都係文科。」
熱愛讀書與考試
至於最後為何選讀法律？Shirley承認與父親有關︰「一直都唔知大學想讀咩，直到要選科，我同屋企人講『其實我冇咩所謂，你哋有咩想我讀？』咁當然爸爸好想我讀法律。最後點解做呢個決定，純粹因為我覺得我已經背慣嘢，應該可以應付得嚟，如果我成績都OK，咁不如我試吓讀法律啦！」
Shirley笑言享受讀書與考試︰「聽落好變態，但我真係好鍾意考試。我好享受讀完一啲嘢，然後去考試，令我覺得自己達成咗啲嘢，係一個目標感、成功感嘅來源。」
曾因疫情後悔入行
不過，畢業後的Shirley沒有投身法律界，反而踏足娛樂圈。她憶述當時被ViuTV監製邀請拍劇，她遂以5年為期，讓自己嘗試新挑戰，「如果佢而家先向我招手，我估我都未必應承，畢竟人大咗未必有本錢去試。」不過她坦言亦有後悔入行的一刻︰「新冠疫情嘅時候！因為真係『冇飯開』，當時覺得如果我仲喺律師樓做，就唔使擔心下個月交唔交到租、使唔使聯絡父母，返屋企住一排先。」
雖然疫情動搖了Shirley的信心，但她亦不忘自我增值，期望隨時有最佳狀態。「有時候發生咗啲小挫折、小困難，如果你從中成長同進步，當你再有機會喺幕前出現，觀眾都會發現到你嘅唔同。機會係留畀有準備嘅人，所以嗰段時間我周圍學習，又學唎酒師，又學日文；喺屋企就睇多啲戲，睇其他人做主持，唔會浪費任何時間。」
做最真實的自己
說到Shirley，不少人都會為她貼上「離地」、「有錢」等標籤，她自言入行後沒有刻意擺脫父母的幫助，但會默默地努力，做好自己。「我非常幸運成為佢哋嘅小朋友，有咁好嘅屋企人喺背後支撐住，有佢哋嚟救我；但佢哋打返嚟嘅江山唔屬於我，唔係我實實在在賺返嚟，感受係唔一樣。正正因為咁，我先更想爭氣畀佢哋睇，因為我一直都係溫室嘅花朵，（入娛樂圈）就想證明畀佢哋睇，『原來你嘅花朵係會成長，可以走出你嘅溫室，去做唔同嘅挑戰，令到你哋安心。』」
入行5年，Shirley建立起自己的演藝事業，她直言並不介懷以上種種標籤︰「有啲人可能會認為我好斯文、知性、麻甩、做作等等，點都好，我都冇所謂，最緊要係觀眾覺得呢個沈殷怡係真實。我得到咩形象都冇所謂，但係希望大家睇得開心，而我都好真實坦誠地畀大家見到我呢一面，因為真實先係最無敵。」
策劃、記者：Crystal
攝影：Peter
剪接︰Mark
監製：Philess
場地︰富薈旺角酒店