المناعة و كورونا والبكتريا والفطريات والفيروسات وعموم الميكروبات
HTML-код
- Опубликовано: 20 сен 2024
- انهارده هنبدأ أول محاضرة من محاضرات علم Immunology المناعة
واوعدكم إن شاء الله ان كتير مننا هيسمع معلومات مهمة وجديدة
في المحاضرات دي هنتكلم عن مكونات جهاز المناعة
واللي دايماً بنشبهه بالدولة اللي عندها جيش ، فيه حرس حدود ومخابرات ووحدات وأسلحة ومنافذ برية وبحرية
إن شاء الله هحاول أجاوبك على معظم الأسئلة اللي ممكن تيجي في بالك
يعني مثلاً
ازاي الجهاز المناعي بتاعك بيعرف ان في إصابة من كائن غريب دخل الجسم ؟
وبيبدأ شغله في خلال وقت أد إيه ؟
ووسائل الاتصالات اللي بيستخدمها عشان حالة الاستنفار اللي بتحصل في الجسم ؟
والأسلحة بتاعته اللي بيستخدمها لما تحصل أي إصابة ؟
والعوامل المساعدة ؟
وازاي احنا أحياناً بنوقف جهازنا المناعي عن الشغل ؟
وازاي الكائن اللي دخل الجسم أحياناً بيتغلب على دفاعات الجهاز المناعي للجسم ؟
ونواتج المعركة اللي بتحصل بين الميكروب والجهاز المناعي بتكون عبارة عن إيه وبتظهر على جسم الإنسان على هيئة إيه ؟
وهنعرف كمان إيه اللي بيضعف الجهاز المناعي ؟
وإيه اللي بيزود كفاءة الجهاز المناعي ؟
كمان هنتكلم عن الحالات المرضية اللي بيكون الجهاز المناعي للإنسان هو نفسه العدو وبيعمل انقلاب على الجسم .
كل الحاجات دي هنتكلم عليها إن شاء الله عموماً ، وتحديداً لما نوع من أنواع البكتريا بيهاجم الجسم
وكل شوية واحنا بنتكلم هنقول سبحان الله
الأول لازم نكون عارفين ان الجهاز المناعي بتاع الإنسان عامل زي جهاز المخابرات في الدولة بيحمي الجسم من أي اعتداء خارجي وكمان له أذرع داخلية للتدخل أحياناً في حالة حدوث أي خلل أمني داخل الجسم .
وطبعاً طول ما الجهاز المناعي بتاعك شغال كويس انت مش بتحس بيه ، انما أول ما يحصل فيه خلل لأي سبب من الأسباب بتحس بتغير كبير في حالتك الصحية .
طب احنا ليه هنتكلم على الجهاز المناعي للإنسان ؟
لإنه خط الدفاع الأول والأخير عن الجسم
وعشان باستمرار في مواجهات مستمرة بين الإنسان وبين الميكروبات اللي موجودة في كل مكان حوالينا
يعني ممكن تكون في النباتات أو الحيوانات أو الحشرات أو حتى ذرات التراب اللي محيطة بينا
طب العدوى ممكن تتنقل للإنسان ازاي ؟
الميكروب بيتنقل للإنسان بطريقة مباشرة أو غير مباشرة
الحقيقة أول لقاء بين الإنسان والميكروب بيكون بعد الولادة مباشرة ، وده بيحصل لما المولود بيخرج من مكان معقم تماماً اللي هو الرحم من خلال قناة الولادة والمنطقة اللي بعد عنق الرحم
أيوه ماشي فين المشكلة ؟
المشكلة ان امنطقة اللي تحت الرحم دي بتكون غنية بأنواع كتيرة من الميكروبات , عشان كده من التحاليل المهمة جداً للست الحامل اننا نعرف عندها بكتريا ضارة في مجرى البول ولالأ ، وده بيحصل عن طريق تحليل البول للحامل وإجراء مزرعة للبكتريا لو لقينا صديد في البول
كمان التهاب الحلق اللي بيحصل لو حصل إصابة بالبكتريا السبحية ، والتهاب الكبد الوبائي بنقل الدم ، مرض السيلان والإيدز عن طريق المباشرة الجنسية ، مرض السل والإنفلونزا والبرد عن طريق العطس ، مرض الكورونا عن طريق الكحة وانتقال الرذاذ من شخص مريض لشخص سليم ، برضو الإصابة ممكن تحصل من الحيوان بطريقة مباشرة عن طريق العض مثلاً ( زي السعار )
كل الطرق اللي فاتت دي بنسميها طرق مباشرة لانتقال العدوي ،
إيه ده هو احنا كمان هنتكلم عن طرق انتقال العدوى ؟
أيوه ، بس هنتكلم عليها إجمالاً مش بتفصيل كبير
نرجع تاني ونقول ان طرق انتقال الميكروب اللي فاتت دي بنسميها طرق انتقال مباشرة يغني انت بتاخد الميكروب من صاحبه على طول
إنما في طرق تانية غير مباشرة لانتقال العدوى ، ودي اللي لازم يكون فيها وسيط بين المريض واللي هيتنقله المرض زي الميه اللي بيستخدمها مريض الكوليرا ويشربها إنسان سليم فيصاب بالعدوى أو عن طريق حشرة عضت حيوان مصاب ونقلت العدوى لإنسان سليم زي مرض اسمه مرض Lyme
( مرض لايم ده أشهر داء بيتنقل عن طريق القرادة في والمرض ده أكتر ناس بيصابوا بيه هما الأوروبيين .
طب المرض ده عبارة عن إيه ؟
عبارة عن بكتريا بتتنقل عن طريق عضة نوع من القراد
أعراض المرض ده بتبدأ بحمى ووجع في الراس والإرهاق وبيصاحب ده كمان طفح جلدي
عندنا مرض خطير كمان بيتنقل عن طريق القرادة
المرض اسمه الحُمى الزرقاء
وده عبارة عن عدوى بكتيرية بتنتقل عن طريق القراد. وممكن تسبب أضرار خطيرة على القلب والكليتين لو متعالجتش بسرعة.
المرض ده منتشر جداً في أمريكا و أجزاء من كندا، والمكسيك
أعراض المرض عبارة عن صداع حادّ وارتفاع شديد في درجة الحرارة. وفي خلال أيام قليلة يظهر الطفح الجلدي على معصم اليد والكاحل. ولازم المرض ده يتعالج بسرعة بالمضادات الحيوية.
ديه كانت أمثلة لانتقال المرض للإنسان عن طريق حشرة أو عائل وسيط زي ما بنطلق عليه
علشان ماتوهش مني بسرعة نرجع تاني لمكونات الجهاز المناعي ؟؟؟
أول دفاعات وأهم مكون من مكونات الجهاز المناعي اللي بيقابلها الميكروب هي الأسطح الداخلية والأسطح الخارجية
طب الأسطح الخارجية دي إيه هيا ؟
هقولك دي الخلايا اللي بيكون ليها تلامس مباشر مع البيئة المحيطة ودي بتكون أول مكان بيقابله الميكروب بالتبعية ودي بتكون :
أيوه يا عم قول
الجلد
ده أول وأهم وأكبر سور حماية ضد أي عدوان خارجي على الجسم
وده كمان بيشمل طبقة من الأنسجة بتغطي العين ( اسمها الخلايا الطلائية )
الأغشية المخاطية اللي بتبطن الفم أو التجويف الفمي والقناة التنفسية والقناة الهضمية والقناة البولية التناسلية .
عارفين الجلد ده عامل زي حارس العمارة اللي حافظ مش فاهم ، يعني لو صاحب العمارة قالوه
متدخلش حد فأكيد مش هيدخل حد
ولو حد حاول يدخل بالقوة هيتعامل معاه بالطريقة اللي حافظها وبنفس الأسلوب مع أي حد
يعني ببساطة الجلد أداة مناعية مش متخصصة بيتعامل مع أي عدو بنفس الطريقة ونفس التكنيك .
طب التكنيك ده هو إيه ؟:
1 - خلاياه متماسكة ومترابطة بإحكام صعب الميكروب يخترقها في الظروف العادية
2 - الجلد بيتكون من 3 طبقات طبقة سطحية وطبقة متوسطة وطبقة داخلية .
2 - عملية الإحلال والاستبدال فيه بتكون مستمرة عشان كده بتطرد البكتريا اللي بتعلق بيه وده بت
ما شاء الله لا قوة إلا بالله ، شرح سهل وبسيط ومفيد جدا
ما شاء الله ربنا يزيدك من علمه دايما 😍 👏👏👏👏
ما شاء الله ، شرح سهل وبسيط ومفيد
رائع يا دكتور