Эвийдээ миний муу хань шүлэг

Эвийдээ миний муу хань
Зохиогч О.Заяа
Шүлгийг бичсэн: О.Заяа
Найруулагч, зураглаач: Э. Энхбадрал
Шүлгийг уншсан: Э. Хонгорзул
Зураглаач, эвлүүлэгч: Э. Жавхлантөгс
Red corner media studio
2021 он
Эвий дээ миний муу хань
Эр хүн нэрэндээ дарагдаад
Эрхэлж ч чадахгүй бардаад
Элэгдэж яваагаа нуух гэсэн дээ л
Үрийнхээ төлөө маргаашийг бодож
Үүрийн гэгээнээр ажилдаа гардаг
Үхтлээ зүтгэх үүрэг авсан цэрэг шиг
Үдшийн бүрийгээр л гэрийн бараа хардаг
Өрөвдөх л юм даа чамайгаа хань минь
Аяга цай уучихаад асгартал хөлрөхийн харахаар эмзэглээд
Амьдрал чамд минь дэндүү их ачаа тохоо юу ч гэж бодох юм
Ачаатай тэмээ шиг чи минь сөхөрч босон зүтгэсээр сэтгэлдээ
Аз жаргалын төлөө алсын бодолд дарагдаж л явдаг байхдаа
Ай даа хань минь баярлах л юм даа чамдаа
Жаргаана гэж надад амласан амлалтандаа хүрэх гэж зүтгээд
Жаалхан үрсээ бодохоор унтах нойроо ч хүртэл харамлаад
Жаргаж мандах нартай уралдаж гүйсээр чи минь
Жаргал гунигийн сүүдэрт элэгдээд л байна даа
Зориг зүрх хоёрыг чинь бишрэх л юм даа хань минь
Үрс минь өсөж өдөр өдрөөр холдон нисэхийн цагт
Үс зүс минь нэгэндээ уусаж нэгдэж ижилдэхийн цагт
Энгэрт минь нялхамсаж чи минь уйлаарай хань минь
Эр хүн нэрээ тайлж орхиод үр минь шиг эрхлээрэй хань минь
Эвий дээ миний муу хань инээж л суух юм даа чи минь
Ажил нь тараад ирж яваа байх аяга хоолыг нь халуун байлгая
Алаг үрсээ санаад яаран гүйж яваа байх инээгээд угтъя
Аз жаргалаа төсөөлөөд завгүй л яваа байх хань нь тэврэе
Амьдралыг минь түшсэн чамтайгаа хамт алс ирээдүй рүү алхъя