“Бид мартахгүй” хөшөөний нээлт, цэцэг өргөх хүндэтгэлийн ёслол Үндэсний цэцэрлэгт хүрээлэнд болов.

Цагдаагийн eрөнхий газрын харьяа "Сүлд" чуулга нь 2019 онд амь насаа алдсан алба хаагчдын гэгээн дурсгалд зориулж энэхүү дууг бүтээжээ. Түүхт 100 жилийн ойн хүрээнд МУСГЗ, цагдаагийн хурандаа Л.Гаваасүрэнгийн шүлэг, МУУГЗ Д.Цэцэрлэгийн хөгжим "Бид мартахгүй" дуучин МУСТА цагдаагийн ахлах ахлагч Э.Нямхүү тус хөшөөний нээлтээр ийн эгшиглүүллээ.
Монгол Улсад орчин цагийн цагдаагийн байгууллага үүсэж хөгжсөний түүхт 100 жилийн ойг тохиолдуулан албан үүргээ гүйцэтгэж яваад баатарлагаар амь эрсэдсэн алба хаагчдынхаа гэгээн үйлсийг мөнхжүүлэх “Бид мартахгүй” хөшөөний нээлт, цэцэг өргөх хүндэтгэлийн ёслол Үндэсний цэцэрлэгт хүрээлэнд болов.
Ийнхүү албан үүргээ гүйцэтгэж яваад амь насаа алдсан алба хаагчдын намтар түүхийг нь сөхөн харваас манай Их сургуулийг төгссөн төгсөгчид олон байдаг учир ийн онцоллоо.
Түүхт ойн хүрээнд бүтээж буй “Бид мартахгүй” хөшөөний харагдах байдал нь тэнгэр өөдөө цойлсон шонхор шувуун дүрс бүхий хананд Монгол цагдаагийн ёсолж буй дүрийг бүтээсэн нь өргөсөн тангарагтаа үнэнчээр зүтгэж, эрхэм нандин үүргээ гүйцэтгэж яваад хань ижил, үр хүүхэд, журмын нөхдийнхөө сэтгэлд зайгаа үлдээж, эр зоригийн дууль болон тэнгэрт одсоныг өгүүлж, хоосон дүрслэл дундуур нар салхи, агаар хур нэвтрэн байх нь амьд бөгөөд мөнх чанарыг бэлгэдсэн байна.
Ёсолж буй цагдаагийн алба хаагчийн дүрсийг 3 давхар болгож харагдуулснаар “Тэр” гэсэн санааг “Тэд” гэж, эх орон, ард түмнийхээ төлөө залуу нас, амь биеэ үл хайхран зүтгэсэн эрэлхэг алба хаагчид минь олуулаа юм шүү гэдэг илэрхийлэл гэж Монголын урчуудын эвлэлийн гишүүн, зураач, барималч, Монгол Улсын соёлын тэргүүний ажилтан Ж.Дүүрэнтөгс хэллээ.
Түмэн олныхоо амар тайван амьдралын төлөө алтан амиа өргөсөн эгэл баатруудынхаа үйлсийг үргэлжлүүлэх үр хүүхдүүдэд нь хүндэтгэл үзүүлэх, эх орныхоо гал цогтой ирээдүй болон хүмүүжихээ илэрхийлэн зогсож байгаа утга санааг хоёр хүүхдийн дүрслэл илэрхийлсэн ажээ.
Өргөсөн тангарагтаа үнэнч байж, эх орныхоо төлөө алтан амиа өргөж сэтгэлд мөнхөрсөн эрсийнхээ гэгээн дурсгалыг нэхэн санаж байна.