نفق سرابيوم سقاره الذي حير العالم The mystery of Serapeum Saqqara

لو الأهرامات واحده من عجائب الدنيا السبع اكيد السرابيوم يستحق يكون الثامن او على الاقل يكون بدل الأهرامات! لان ممكن تقول نظريات زى ما تحب عن طريقة بناء الأهرامات لأنها مبنيه على أرض واسعه و فوق الأرض لكن السرابيوم حاجه تانيه خالص...
للاسف ناس كتير متعرفش المكان ده رغم انه أقوى دليل ان المصريين القدماء كان عندهم تكنولوجيا تفوق عصرنا الحالى!!
السرابيوم فى الروايات الرسميه هو مدفن العجل المقدس ابيس و بيتكون من مجموعه من التوابيت تحت الارض لوضع العجل بعد موته فيه.
طيب تعالى نشوف حقيقة المكان المعجزه ده بمجرد شوية قياسات و ملاحظات الى راح هناك و شاف عظمة المكان ده.
ده اقدم نفق تم حفره فى التاريخ داخل صخور هضبة سقاره حفر المكان ده معجزه لو تشوف فى الصور هتلاقى حفر نصف دائرى منتظم جدا زى الحفر الى بيتم بالاجهزه العملاقه فى العصر الحالى بس مش دى المعجزه الوحيده..
الصناديق الموجوده و بعتقد تماما انها فى الأساس لم يتم صنعها كتوابيت ،مصنوعه من عدة احجار زى الجرانيت و البازلت و دول من اصلب الأحجار فى العالم وبيتم قطعهم فى عصرنا الحالى بسنون من الماس مبرمجه بأجهزة كمبيوتر ثقل الواحد بيوصل ل ١٠٠ طن الغطاء فقط ٢٠ او ٣٠ طن منفصل مش بس كده الصناديق منحوته بالكامل وليست مركبه يعنى جسم الصندوق + الغطاء فقط! مش متركب كأجزاء و طبعا ده أصعب بكتير كمان المحاجر دى فى اسوان يعنى الأوزان الرهيبه دى تم نقلها من اسوان لسقاره ثم تم انزالها بعد حفر النفق وكمان كل صندوق تم وضعه فى حجره تحت مستوى الممر الموجود داخل النفق يعنى لو مقتنع انهم ممكن يدفعوا الصناديق للداخل طيب ازاى رفعوها و حطوها فى مستوى منخفض!؟ بس اكيد الى يعرف يتعامل مع حجم ١٠٠ طن من اسوان لسقاره اكيد يعرف يرفعه و يوضعه فى مكانه.
المعجزه الثالثه ان كل زوايا الصناديق من الداخل ٩٠ درجه بالظبط مش ٩٠,٣ مش ٨٩,٧ لا ٩٠ بالظبط! ومش بس كده ده كمان مصقوله و ملمعه زى رخام المطابخ بالظبط الى فى عصرنا بتتعمل بالاجهزه الكهربائيه بالظبط .
الغريب ان المكتشف الفرنسي الى اكتشف المكان وجد صندوق واحد مغلق وطبعا مقدرش يزيح ٣٠ طن وزن الغطاء عشان يعرف ايه بداخله فتم للاسف تفجير الصندوق و المفاجأه لم يعثر على شئ بداخله!
لما زرت المكان واضح ان لم يتم الانتهاء من العمل فى المكان و الدليل على كده فى حجرات للصناديق لسه مفيهاش صناديق و كمان فى صندوق موجود فى الممر واضح انه كان فى طريقه للنزول للحجره المخصصه ليه و كمان غطائه موجود جمبه على الأرض بس ياترى ايه الى خلاهم يوقفوا العمل على المشروع ده فجأه رغم قربهم من الانتهاء منه!؟
مش عارف ليه محدش مهتم بقيمة مكان زى ده ومحدش يعرف عنه حاجه تقريبا والبعض مكتفيين بوصفه مدافن عجول فقط بدون الاهتمام باى من التفاصيل السابقه وكأنها حاجه عاديه
انا نفسى اعتقد المكان ده كان مصنع او منشأه من نوع ما لتوليد او حفظ الطاقه زى البطاريات مش مجرد مدافن للعجول.

[@عبيرخفاجي]

رائع 👏👏👏👏 والموسيقي تجنن ومناسبه جدااا بجد هايل التصوير واضح ودقيق 😍

[@NinaSaid-ty3ok]

اكتر من رائع

[@cap-ahmed-refaat]

🇪🇬💓

[@salah500salem6]

سرابيوم أكبر لغز من ألغاز المصريين القدماء

[@TheKasawi]

ما مصدر الاضاءة على أسفل جدران الأنفاق و شكرا

[@cap-ahmed-refaat]

اضاءه من الوزاره والترميم

[@boomvoyaj9998]

100 طن كيف حملت كيف دخلت في هذا المكان الضيق كيف اداروه وادخلوه في الغرفه وهو 100 طن كيف استطاعو الالتفاف فيه ؟؟؟ كيف النفق ضيق وادخلوا التابوت ؟؟ انا مخي راح ينفجر من التفكير والتحليل ساعات اقول انهم وضعوا التابوت ثم بنوا وساعات اقول حفروا الانفاق ثم نحتوا التوابيت بالداخل واقول كيف ولايوجد جرانيت الا في مسافات بعيده ؟؟ اكاد اجزم ان هناك تكنلوجيا مفقوده وادوات مفقوده وعلم مفقود او ان الجن كانوا يعملون معهم

[@cap-ahmed-refaat]

معظم التفسيرات بتأكد انه كان في حضاره متقدمه عن وقتنا الحالي وتعرضت لكارثه ما

[@saeedshibani]

هذه التوابيت لا نستطيع نحن صناعة واحدة منها برغم التقدم الكبير للتكنولوجيا و لكننا يجب أن نعود الى قول الله تعالى في سورة الروم { أَوَلَمْ يَسِيرُوا فِي الْأَرْضِ فَيَنظُرُوا كَيْفَ كَانَ عَاقِبَةُ الَّذِينَ مِن قَبْلِهِمْ ۚ كَانُوا أَشَدَّ مِنْهُمْ قُوَّةً وَأَثَارُوا الْأَرْضَ وَعَمَرُوهَا أَكْثَرَ مِمَّا عَمَرُوهَا وَجَاءَتْهُمْ رُسُلُهُم بِالْبَيِّنَاتِ ۖ فَمَا كَانَ اللَّهُ لِيَظْلِمَهُمْ وَلَٰكِن كَانُوا أَنفُسَهُمْ يَظْلِمُونَ} ​@@cap-ahmed-refaat

[@saeedshibani]

👆